وادەی کۆبوونەوەی پەرلەمانی عێراق لەبارەی دەرکردنی هێزەکانی ئەمریکا ئاشکرا دەکرێت

ئاڤا دیجیتاڵ

 

پەرلەمانتارێکی فراکسیۆنی سادقوونی سەر بە عەسائیبی ئەهلی حەق ئاشکرای دەکات، ڕۆژی شەممەی داهاتوو ئەنجوومەنی نوێنەرانی عێراق لەسەر پرۆژەیاسای دەرکردنی هێزەکانی ئەمریکا کۆدەبێتەوە. 

 

وێنە گەورەکە: لە بەرامبەر هێرشەکەی شەوی ڕابردووی ئەمریکا بۆ بەئامانجگرتنی فەرماندەیەکی کەتائیبی حیزبوڵڵای عێراقی، لایەنە شیعییەکان داوای دەرکردنی هێزەکانی ئەمریکا و هاوپەیمانان لە عێراق دەکەن. 

 

بۆچی گرنگە: هێزەکانی هاوپەیمانان لەگەڵ دەستپێكردنی شەڕی داعش هاتوونەتە عێراق و هەرێمی کوردستان ڕاوێژ و ڕاهێنان بە هێزی پێشمەرگەی کوردستان و هێزە ئەمنییەکانی عێراق دەدەن، دەرچوونی هاوپەیمانان لەکاتێکدایە کە جموجوڵی داعش لە ناوچەکە زیادیکردووە، بەمەش مەترسیی سەرهەڵدانەوەی داعش زیاتر دەبێت. 

 

لێدوانی فەرمی: محەممەد بەلداوی، فراکسیۆنی سادقوونی سەر بە عەسائیبی ئەهلی حەق کاردەکەین بۆ کۆکردنەوەی واژۆ بۆ کۆبوونەوەی پەرلەمانی عێراق و بڕیارێک بۆ دەرکردنی هێزەکانی ئەمریکا لە عێراق، پێویستە حکومەت هاوپەیمانیی نێودەوڵەتی ئاگادار بکاتەوە تاوەکو پرۆسەی کشانەوەی هێزە دەرەکییەکان لە عێراق خێراتر بکات".

 

باکگراوند: شەوی ڕابردوو، ئەمریکا بە درۆن ئۆتۆمبێلێکی لە بەغدا کردە ئامانج و دوو فەرماندەی کەتائیبی حیزبوڵڵای عێراق بەناوەکانی " ئەبو باقر ساعیدی و ئەرکان عەلیاوی" کوژران.