شاندێکی ئەمنیی عێراق بۆ تاوتوێکردنی هێرشەکانی تورکیا لە هەولێرە

ئاڤا نیوز

 

شاندێکی ئەمنیی عێراق بەسەرۆکایەتیی قاسم ئەعرەجی، ڕاوێژکاری ئاسایشی نەتەوەیی گەیشتە هەولێر و بڕیارە لەگەڵ سەرۆکوەزیران بارزانی کۆببێتەوە و نوێترین پێشهاتە ئەمنییەکانی عێراق و هەرێمی کوردستان باس بکەن. 

وێنە گەورەکە: عێراق لەشکرکێشییەکانی تورکیا بۆ سەر خاکەکەی ڕەتدەکاتەوە، هاوکات بۆ وەرگرتنی هەڵوێستێکی یەکگرتوو شاندەکە لەسەر داوای  ئەنجوومەنی وەزاری بۆ ئاسایشی نیشتمانیی عێراق هاتووەتە  هەولێر کە دوێنێ  بەسەرپەرشتیی سوودانی کۆبووەوە.

 

لێدوانی فەرمی: نووسینەگەی ڕاگەیاندنی قاسم ئەعرەجی بە ئاڤا نیوزی ڕایگەیاند: بەپێی ڕێنماییەکانی سەرۆکوەزیران لیژنەیەک نێردراوە بۆ پێداچوونەوە و چاودێریکردنی پێشهاتەکان لەلایەنی تورکیاوە لەسەر سنووری عێراق، هاوکات لەشکرکێشیی بۆ نێو هەرێمی کوردستان و وەرگرتنی هەڵوێستێکی یەکگرتوو لەمبارەیەوە.

 

ئەوەی پێویستە بیزانیت: لە کۆبوونەوەی دوێنێی ئەنجوومەنی وەزیرانی ئاسایشی نیشتمانی عێراق "لەشکرکێشی و پێشێلکارییە سەربازییەکانی تورکیا بۆ سەر خاکی عێراقی ڕەتکرایەوە، هاوکات بە پێویست زانرا تورکیا ڕەچاوی پرەنسیپەکانی دراوسێیەتی باش بکات.