پارتی و یەکێتی لەبارەی دابەشکردنی پۆستەکانی نەینەوا کۆدەبنەوە

ئاڤا نیوز

هەفتەی داهاتوو بۆ پارێزگای نەینەوا یەکلایکەرەوە دەبێت، لەلایەک دادگەی فیدراڵی و، لە لایەکی دیکە پارتی و یەکێتی بۆ ڕێککەوتن لەبارەی دابەشکردنی پۆستەکانی ئەو پارێزگایە کۆدەبنەوە.

وێنە گەورەکە: لە کۆبوونەوەی 02-07-2024 ئەنجوومەنی پارێزگای نەینەوا، 14 پۆستی ئیداری یەکلاکرانەوە، پارتی و هاوپەیمانیی نەینەوا لیئەهلیاش کە 13 ئەندام لەخۆدەگرێت دانیشتنەکەیان بایکۆت کرد، دواتر لەلایەن ئەنجوومەنی وەزیرانی عێراق دابەشکردنی پۆستەکان هەڵپەسێردرا.

لێدوانی فەرمی: مەناف حەسەن، کارگێڕی لقی پارتی لە موسڵ بە ئاڤا نیوزی گوت، "هەوڵەکان بۆ گەیشتن بە ڕێککەوتن لەگەڵ یەکێتی بەردەوامن هەفتەی داهاتوو کۆدەبینەوە، ئامادەین بەشێک لە پۆستەکانی خۆمانیان پێبدەین، بەڵام جگە لە قایمقامەکانی شێخان و مەخموور، ناحیەکانی سنوونێ، وانکێ و ئەلقووش.

بۆچوونی لایەنی بەرامبەر: محەممەد جاسم، ئەندامی ئەنجوومەنی پارێزگای نەینەوا لە پشکی یەكێتی بە ئاڤا نیوزی گوت، "لە بەرامبەر پێدانی قایمقامی مەخموور بە پارتی، پۆستی قایمقامی شنگالمان دەوێت، بۆ دەستبەرداربوون لە پۆستی بەڕێوەبەری ناحیەی سنوونێ، داوای بەڕێوەبەری ناحیەی ئەلقووش دەکەین."

لەلایەکی دیکەوە: بڕیارە هەفتەی داهاتوو لەسەر سکاڵای لایەنە ناڕازییەکان دادگەی فیدراڵی کۆببێتەوە و بڕیار لەبارەی یاسایی بوون یاخود هەڵوەشاندنەوەی دابەشکردنی پۆستەکان بکات.

ئەوەی پێویستە بیزانیت: ئەنجوومەنی پارێزگای نەینەوا لە 29 کورسی پێکدێت، پارتی چوار کورسی و یەکێتی دوو کورسی هەیە، سێ کورسیش کۆتان.