پارتی دانیشتنی ئەنجوومەنی پارێزگای نەینەوای بایکۆت کرد

ئاڤا دیجیتاڵ

 

پارتی دیموکراتی کوردستان و هاوپەیمانیی نەینەوا لیئەهلیها، بایکۆتی دانیشتنی ئەنجوومەنی پارێزگای نەینەوایان کرد، بەهۆی ڕێکنەکەوتن لەسەر پۆستی جێگری دووەمی پارێزگاری نەینەوا. 

 

چیرۆکی سەرەکی: کاتژمێر 01:00ـی دوای نیوەڕۆی ئەمڕۆ پێنجشەممە، کۆبوونەوەی ئەنجوومەنی پارێزگای نەینەوا بۆ هەڵبژاردنی جێگرانی پارێزگار دەستیپێکرد؛ بەڵام 15 ئەندامی ئەنجوومەنەکە بایکۆتی دانیشتنەکەیان کرد و ڕێژەی یاسایی تەواو نەبوو.

 

لێدوانی فەرمی: ئێریڤان مەهدی حاجی، ئەندامی فراکسیۆنی پارتی لە ئەنجوومەنی پارێزگای نەینەوا بۆ ئاڤا نیوزی ڕایگەیاند، بڕیاربوو ئەمڕۆ جێگری یەکەمی پارێزگاری نەینەوا لەسەر پشکی پارتی دیاری بکرێت، بەڵام بەبێ ئەوەی جێگری یەکەم دەستنیشان بکرێت ئەنجوومەنەکە دەستی بە دیارکردنی جێگری دووەم کرد.

 

زانیاریی زیاتر: سەرۆکی ئەنجوومەنی پارێزگای نەینەوا پەیڕەوی ناوخۆی ئەنجوومەنەکەی پێشێل کردووە، بەهۆی ئەو هەوڵەی ئەنجوومەنی پارێزگاکەوە، ئەندامانی فراکسیۆنەکانی پارتی دیموکراتی کوردستان لەگەڵ نەینەوا لیئەهلیهای سەر بە نەجم جبووری، دانیشتنەکەیان بەجێهێشتووە. 

 

گۆشەیەکی دیکەی دیمەنەکە: بەگوێرەی ڕێککەوتنی لایەنە سیاسییەکان، پۆستی جێگری یەکەمی پارێزگاری نەینەوا دەدرێتە پارتی و کاندیدەکەی سیروان ڕۆژبەیانییە.

 

ئەوەی پێویستە بیزانیت: 15 ئەندام بایکۆتی دانیشتنەکەیان کرد، بەمەش 14 ئەندام لە ژوورەوە مابوون و ڕێژەی یاسایی تەواو نەبوو، ئێستا دانیشتنەکە تەواو نەبووە و دوو جێگرەکە دیارنەکراون.

 

باکگراوند: ڕۆژی 18-12-2023، هەڵبژاردنی ئەنجوومەنی پارێزگاکانی عێراق بەڕێوەچوو، بەگوێرەی ئامارەکانی کۆمیسیۆن ڕێژەی بەشداریکردن لە هەڵبژاردنەکە گەیشتە 41% و لە 21ـی کانوونی دووەمی 2024 کۆمیسیۆنی باڵای سەربەخۆی هەڵبژاردنەکانی عێراق ئەنجامی هەڵبژاردنەکەی پەسەندکرد.