پەیامێکی تووند لە ڕێکخراوی بەدرەوە لەبارەی هێرشەکەی شەوی ڕابردووی ئەمریکا

ئاڤا دیجیتاڵ

 

ڕێکخراوی بەدر کە هادی عامری، سەرۆکی هاوپەیمانیی فەتح سەرۆکایەتی دەکات پەیامێکی تووندی سەبارەت بە هێرشی شەوی ڕابردووی ئەمریکا بڵاوکردووەتەوە و دەڵێت، کوژرانی ئەبو باقر ساعدی بە ڕاگەیاندنی شەڕ لە دژی عێراق دەزانین. 

وێنە گەورەکە: کاردانەوەکانی هێرشەکەی شەوی ڕابردووی ئەمریکا لە بەغدا بۆ کوشتنی فەرماندەی گرووپێکی چەکداری سەر بە حەشدی شەعبی بەردەوامە، لەو چوارچێوەیەدا ڕێکخراوی بەدر هێرشەکە بە ڕاگەیاندنی شەڕ لە دژی عێراق ناودەبات.

 

لێدوانی فەرمی: ڕێکخراوی بەدر لە ڕاگەیێنراوێکدا سەبارەت بە هێرشەکەی شەوی ڕابردووی ئەمریکا دەڵێت، "ئەم تاوانە گوزارشت لە ئیرادەی ئەمریکا و هاوپەیمانەکانی دەکات بۆ مامەڵەکردن بە تێگەیشتنی کوشتن و دڕندەیی، ڕشتنی خوێنی منداڵەکانمان ئەمەش ئەوە دەگەیێنێت دان بە شێوازی گفتوگۆ و لێکتێگەیشتن نانێت".

 

زانیاریی زیاتر: بوونی هێزی بیانی لە عێراقدا خودی بنەمای تاوان و توندوتیژی و هاندانی دروستکردنی ململانێکەن، بۆیە ئێستا داوا لە حکومەت دەکەین، بە زووترین کات هەوڵی جددی بدات بۆ دەرکردنی ئەو هێزانە.

 

باکگراوند: شەوی ڕابردوو، ئەمریکا بە درۆن ئۆتۆمبێلێکی لە بەغدا کردە ئامانج و دوو فەرماندەی کەتائیبی حیزبوڵڵای عێراق بەناوەکانی " ئەبو باقر ساعیدی و ئەرکان عەلیاوی" کوژران.