ئەنجوومەنی نوێنەرانی عێراق لەبارەی هێرشەكانی ئەمریكا كۆدەبێتەوە

ئاڤا دیجیتاڵ

دوای كۆكردنەوەی زیاتر لە 100 واژۆ بۆ دەركردنی هێزە بیانییەكان لە عێراق، شەممەى داهاتوو کە دەکاتە 10ی مانگ، ئەنجوومەنی نوێنەرانی عێراق كۆدەبێتەوە و گفتوگۆ دەکات لەبارەی "ئەو دەستدرێژیانەی دەكرێنە سەر سەروەری عێراق".

بۆچی گرنگە: هێزەکانی هاوپەیمانان بەسەرۆکایەتیی ئەمریکا لە عێراق و هەرێمی کوردستان ڕاوێژ و ڕاهێنان بە هێزی پێشمەرگە و هێزە ئەمنییەکانی عێراق دەدەن. داواکاریی دەرچوونی هاوپەیمانان لەکاتێکدایە هێشتا مەترسیی داعش کۆتایی نەهاتووە و جموجۆڵیان زیادی کردووە.

باکگراوند: لە کاردانەوە بەردەوامەکانی ئەمریکا وەک تۆڵەی کوژرانی سێ سەربازیان لە ئوردن، شەوی ڕابردوو بە درۆن ئۆتۆمبێلێكی لە بەغدا كردە ئامانج و دوو فەرماندەی كەتائیبی حیزبوڵڵای عێراق بە ناوەكانی " ئەبو باقر ساعیدی و ئەركان عەلیاوی" كوژران. 

کاریگەری و لێکەوتەکان: نووسراوێك ئاراستەی سەرۆكایەتیی ئەنجوومەنی نوێنەرانی عێراق كراوە و تێیدا هاتووە: بەهۆی بەردەوامی "دەستدرێژییەكانی" ئەمریكا بۆ سەر هێزە ئەمنییەكان، حەشدی شەعبی و هاووڵاتیان، داوای دەرچوونی هێزە بیانییەكان لە عێراق دەكەن. لە نووسراوەكەدا 103 ئەندام واژۆیان كردووە.

ئەوەی پێشبینی دەکرێت: لە خشتەی كاری ئەنجوومەنی نوێنەرانی عێراقدا هاتووە: دانیشتنێك بۆ گفتوگۆكردن لەسەر "دەستدرێژییەكان بۆ سەر خاكی عێراق " ڕۆژی شەممە 10 ی شوباتی 2024 كاتژمێر پێنجی ئێوارە بەڕێوەدەچێت.