نرخی نەوتی برێنت بۆ 77 دۆلار دابەزی

ئاڤا نیوز

بەهۆی سەقامگیربوونی ئاڵۆزییەکانی ڕۆژهەڵاتی ناوەڕاست و پێشبینییەکان بۆ زیادبوونی نەوتی کۆگاکراوی ئەمریکا، نرخی نەوت لە مامەڵەکانی ئەمڕۆ دابەزی.

چیرۆکی سەرەکی: نرخی بەرمیلێک نەوتی خاوی برێنت لە گرێبەستەکانی داهاتوو بە ڕێژەی 0.1٪ بۆ 77.11 دۆلار بۆ هەر بەرمیلێک دابەزی، هەروەها نرخی بەرمیلێک نەوتی ڕۆژئاوی تێکساس بە ڕێژەی 0.2٪ بۆ 73.05 دۆلار دابەزی.

هۆکارە زانراوەکان: دابەزینی نرخی نەوت بۆ دوو هۆکار دەگەڕێتەوە:

یەکەم: بڕیارە ئەمڕۆ فەرمانگەی وزەی ئەمریکا ئاماری فەرمی نەوتی کۆگاکراوی ئەم هەفتەیە بڵاوبکاتەوە و پێشبینی دەکرێت بەرزبێتەوە، هەفتەی ڕابردووش بە بڕی 347 هەزار بەرمیل نەوت بەرزبوونەوەی تۆمارکردبوو. 

دووەم: سەردانی وەزیری دەرەوەی ئەمریکا بۆ ڕۆژهەڵاتی ناوەڕاست بەمەبەستی هێورکردنەوەی دۆخەکە، پێشبینی دەکرێت ناوچەکە سەقامگیر بێت.