شاخەوان عەبدوڵڵا: ئەمڕۆ مووچەی مانگی حەوت خەرج دەکرێت

ئاڤا نیوز

جێگری سەرۆکی پەرلەمانی عێراق ڕایدەگەیێنێ، مووچەی فەرمانبەرانی  هەرێمی کوردستان هیچ کێشەیەکی نییە، ئەمڕۆ سوودانی مووچەی مانگی حەوت و هەفتەی داهاتووش مووچەی مانگی هەشت خەرج دەکات.

لێدوانی فەرمی: شاخەوان عەبدوڵڵا، جێگری سەرۆکی پەرلەمانی عێراق، لە کۆنگرەیەکی ڕۆژنامەوانیدا ڕایگەیاند، ئەمڕۆ محەممەد شیاع سوودانی، سەرۆکوەزیرانی عێراق مووچەی مانگی حەوتی مووچەخۆرانی هەرێمی کوردستان خەرج دەکات. هەفتەی داهاتووش تەواوی مووچەی مانگی هەشتی فەرمانبەران و هێزە ئەمنییەکان خەرج دەکرێت.

زانیاریی زیاتر: شاخەوان عەبدوڵڵا کە لەسەر پشکی پارتی پۆستەکەی وەرگرتووە، جەختی کردەوە؛ سوودانی لەگەڵ وەزارەتی دارایی عێراق لەسەر هێڵە، ڕێگە نادات هیچ کێشمە کێشمێکی سیاسیی ڕێگری لە ناردنی مووچە بکات و لەمەودوا مووچەی لە پرسی کەسی و سیاسی دەردەهێنن.


لەلایەکی دیکەوە: هەفتەی داهاتوو نوێنەرانی کورد لە بەغدا (وەزیرانی کورد و فراکسیۆنە کوردستانییەکان) لەبارەی پرسی مووچە کۆدەبنەوە. شاخەوان عەبدوڵڵا گوتی قسەی لەگەڵ سەرجەم لایەنەکان و تەنانەت لەگەڵ سەرۆککۆماریش کردووە.

باکگراوند: بەغدا  تاوەکو ئێستا لەکۆی نزیکەی 950 ملیار دینار بۆ مووچەی هەر مانگێک، تەنیا 36 ملیاری بۆ مانگی حەوت و ، نزیکەی 550  ملیارد دیناریشی بۆ مووچەی مانگی هەشت ناردووە، ئێستاش شاندێکی وەزارەتی دارایی و ئابووریی هەرێمی کوردستان بۆ چارەسەرکردنی گرفتەکان لە بەغدایە.