پەناگەی سەگە بێلانەکانی هەولێر لەبارەی جۆرێک ئاژەڵ زانیاری نوێ بە ئاڤا نیوز دەدات

ئاڤا نیوز 

 

ئەم هەفتەیە ئاڤا نیوز بۆ یەکەمجار زانیاری لەبارەی ئاژەڵێکی هاوشێوەی گورگ بڵاوکردوەوە بەناوی "گورگاز"، پەناگەی سەگە بێلانەکانی هەولێر لەسەر ئەو ئاژەڵە، زانیاریی نوێیان هەیە.

وێنە گەورەکە: ڕووبەرێکی بەرفراوانی هەرێمی کوردستان لە ناوچەی شاخاویی و چیایی پێکدێت، ئەم تایبەتمەندییە هۆکارێکی کاریگەرە بۆ ئەوەی سەدان جۆر ئاژەڵ و باڵندەی کێوی تیایدا بژین.

 

لێدوانی فەرمی: ژیار جەلال، بەڕێوەبەری گشتیی بەڕێوەبەرایەتیی خزمەتگوزاریی ژینگەپارێزی هەولێر بە ئاڤا نیوزی ڕاگەیاند: لە سەرەتای دروستکردنی پەناگەی سەگە بێلانەکانی هەولێر لەساڵی 2023، پێنج بۆ شەش گورگازمان لابوو بۆ ئێمەش نوێ بوو، چونکە یەکەمجار بوو ئاژەڵی لەمجۆرە دەربکەوێت. بەهۆی ئەوەی سەگەکان لەو پەناگەیە لە زاوزێ دەخرێن و دووبارە دەگەڕێنرێنەوە ناو سروشت، ئەو گورگازانەش لە پەناگەکە نەماون. 

 

زانیاریی زیاتر: لەبارەی ئەو گورگازەی لەماوەی ڕابردوودا لە گەڕەکی هیران سیتی هەولێر بینراوە، ژیار جەلال دەڵێت: دوو شەو بەدوای یەک تیمەکانمان لەو گەڕەکە گەڕانیان ئەنجامدا، بەڵام ئەو ناوەی جێهێشتبوو.

 

ئەوەی پێویستە بیزانیت: گورگاز لە ئەنجامی جووتبوونی سەگ و گورگ دروست دەبێت، لێکۆڵەران دەڵێن، بەهۆی دوورکەوتنەوەی گورگەکان لە ئاوەدانی و مانەوەی بەشێک لە گورگە مێیەکان لە ئاوەدانی، لەگەڵ سەگەکان جووت دەبن و گورگاز دێتە بوون، لەماوەی ڕابردوودا لە ناوچەی شێروان مەزنی دەڤەری بارزان ژمارەیەک گورگاز دەرکەوتن.