پرسی هاوردەکردنی بەرهەمە کشتوکاڵییەکان لەگەڵ عێراق چارەسەر دەکرێت

ئاڤا نیوز

گرفتێکی جووتیارانی هەرێمی کوردستان پابەندنەبوونی عێراقە بە قەدەغەکردنی هاوردەی بەرهەمە کشتوکاڵییەکان لە وەرزی هاوین، لە کۆبوونەوەکانی ئەم دوو ڕۆژەی شاندە ئابوورییەکانی  هەردوولا لە هەولێر، گفتوگۆی لەسەر دەکرێت و هەوڵ بۆ چارەسەرکردنی دەدرێت.

وێنە گەورەکە: ڕێککەوتنێک لەنێوان هەرێمی کوردستان و عێراق هەیە، لە چوارچێوەی پاڵپشتیکردنی بەرهەمە خۆماڵییەکان  و بۆ ئەوەی ڕەنجی جووتیاران بەهەدەر نەڕوات، بەگوێرەی ڕۆژژمێری کشتوکاڵی هەناردەکردنی هەندێک بەرهەمی کشتوکاڵی ڕابگیرێت، بەڵام عێراق پابەندی ڕێککەوتنەکە نەبووە.

 لێدوانی فەرمی: بەختیار ئەحمەد، گوتەبێژی یەکێتیی هاوردە و ناردنکارانی کوردستان بە ئاڤا نیوزی گوت، "عێراق لە ڕێگەی دەروازە سنوورییەکانەوە زیاتر لە 20 بەرهەمی کشتوکاڵی بەگوێرەی وەرزەکان هاوردە دەکات، سەرجەم بەرهەمەکانیش لە ئێرانەوە دێن."

خاڵە ئەرێنییەکان: لە کۆبوونەوەی ئەمڕۆی هەردوو ئەنجوومەنی ئابووریی عێراق و هەرێمی کوردستان، جەحت لە بەهێزکردنی هەماهەنگی بۆ برەودانی زیاتر بە کەرتی کشتوکاڵ و، یەکخستنی ڕێکارەکان بۆ قەدەغەکردنی هاوردەکردنی بەرهەمی دەرەکی، بەگوێرەی پێویستی و زیادکردنی پشتیوانی بۆ بەرهەمی نێوخۆ دەکرێت.

باکگراوند: ئیوارەی دوێنێ شاندێکی ئابووریی عێراق گەیشتە هەولێر و بەسەرپەرشتیی سەرۆکوەزیران بازرانی لەماوەی دوو ڕۆژدا ژمارەیەک کۆبوونەوە لەگەڵ حکومەتی هەرێمی کوردستان دەکەن، ئامانجی کۆبوونەوەکان گفتوگۆکردن و چارەسەرکردنی پرسە هەڵپەسێردراوەکانی نیوان هەردوولایە.