کەسوکاری بەهزاد خوسرەوی ڕەتیدەکەنەوە کوڕەکەیان ئازاد کرابێت

ئاڤا نیوز

دوای چەند ڕۆژێک لە ڕادەستکردنەوەی بە وڵاتی ئێران لەلایەن هێزە ئەمنییەکانی شاری سلێمانییەوە، بەهزاد خوسرەوی لە گرتە ڤیدیۆیێکدا دەردەکەوێت.

 

وێنە گەورەکە: دوای ئەوەی لەچەند ڕۆژی ڕابردوودا بەهزاد خوسرەوی چالاکوانی سیاسیی کورد و دانیشتووی شاری سلێمانی لەلایەن هێزە ئەمنییەکانی ئەم شارەوە ڕادەستی وڵاتی ئێران کرایەوە، ئێستا لە تۆڕی کۆمەڵایەتی ئینستاگرام گرتە ڤیدیۆیەکی بڵاوبۆتەوە و تیایدا دەڵێت:"موڵەتی مانەوەم لە هەرێمی کوردستان نەبووە و حزبی دیموکراتی کوردستانی ئێران هیچ هاوکاریەکی نەکردووم، هەر بۆیە چوومەتە لای هێزەکانی ئاسایش و داوام لێ کردوون بمنێرنەوە بۆ ئێران و ئەوانیش منیان تاوەکو سەر سنوور هێناوە و دواتر بۆ ئێران گەڕاومەتەوە و ئێستاش ئازادم".

 

ئەوەی پێویستە بیزانیت: کەسوکاری بەهزاد خوسرەوی لە لێدوانێکییان بۆ ماڵپەڕی فەرمی ڕێکخراوی مافی مرۆڤی هەنگاو، سەرەڕای ڕەتکردنەوەی هەواڵی ئازادکردنی کوڕەکەیان دەڵێن، ناوبراو ئێستاش لە دەستبەسەرگەی ئیدارەی ئیتلاعاتی سنە ڕاگیراوە و ئەم ناوەندە ئەمنییە لەژێر گوشار بەهزادیان ناچار کردووە بە خوێندنەوەی نووسراوێک، کە پێشتر بۆی ئامادەکراوە.

 

زانیاریی زیاتر: بەپێی ماڵپەڕەکە ئەم لاپەڕەیەی ئینستاگرام، کە گرتە ڤیدیۆییەکەی تیادا بڵاوکراوەتەوە بە ناوی بەهزاد خەسرەوی لە نیوەڕۆی ئەمڕۆ دەستی بەکار کردووە و لەلایەن ئیدارەی ئیتلاعاتی سنە بەڕێوە دەبرێت، تا ئێستا نزیکەی 800 فۆڵۆوەرزی هەیە، کە لە %90ـی فۆڵۆوەرزەکانی ساختەن.

باکگراوند: بەهزاد خوسرەوی چالاکوانێکی تەمەن 35 ساڵە و خەڵکی سەقزی ڕۆژهەڵاتی کوردستانە و لە سلێمانی دەژیا، خاوەن پێداویستیی تایبەت بوو. بەپێی ڕاپۆرتێکی ڕێکخراوی هەنگاو، دوای دەستگیرکردن و ئەشکەنجەدانی لەلایەن هێزە ئەمنییەکانی سلێمانی ڕادەستی ئێران کراوەتەوە.