سێیەمین کۆبوونەوەی عێراق و تورکیا بۆ چارەسەری کێشەی ئاو بەڕێوەدەچێت

ئاڤا نیوز

بەمەبەستی گەرەنتیکردنی پشکی ئاوی عێراق و گەیشتن بە لێکتێگەیشتنێک کە جێگەی ڕەزامەندی هەردوولابێت، لیژنەی هەمیشەیی هاوبەشی ئاو لەنێوان عێراق و تورکیا لە ئەنقەرە کۆدەبێتەوە.

 

وێنە گەورەکە: مانگی نیسانی ئەمساڵ عێراق و تورکیا لەسەر دروستکردنی ژمارەیەک پڕۆژەی ستراتیژی پەیوەست بە پاراستنی سامانی ئاو ڕێککەوتن، پڕۆژەکان حکومەتی عێراق بە سوود وەرگرتن لە ئەزموونی لایەنی تورکی جێبەجێ دەکرێن.

 

ڕاگەیێنراوی فەرمی: باڵیۆزخانەی عێراق لە ئەنقەرە بڵاویکردەوە، شاندی عێراق بەسەرۆکایەتیی حسێن عەبدولئەمیر بریکاری وەزارەتی ئاو گەیشتووەتە تورکیا، هاوکات بەشداری لە سێیەمین کۆبوونەوەی لیژنەی هەمیشەیی هاوبەش بۆ ئاو دەکات.

 

لە کۆبوونەوەکەدا چۆنیەتی باشتر پاراستنی سامانی ئاو و سوود لێوەرگرتنی، کێشە هەڵپەسێردراوەکانی تایبەت بە ئاو لەنێوان هەردوو وڵات، گەرەنتی وەرگرتنی پشکی عێراق لە ئاوی ڕووباری دیجلە و فورات و گەیشتن بە لێکتێگەیشتنێک کە جێگەی ڕەزامەندی هەردوولابێت گفتوگۆیان لەسەر دەکرێت.