داوای جێبەجێکردنی ئەو یاسایانە دەکرێت کە بۆ پاراستنی مافی ڕۆژنامەنووسان داڕێژراون

ئاڤا نیوز 

 

کۆمیسیۆنی باڵای مافی مرۆڤ لە عێراق داوای جێبەجێکردنی ئەو یاسایانە دەکات کە بۆ پاراستنی ڕۆژنامەنووسان لە پێشێلکارییەکانی بەرامبەریان داڕێژراون.

 

وێنە گەورەکە: كۆمەڵەی گشتی نەتەوە یەكگرتووەكان لە ساڵی 2013وە، ڕۆژی 2ی تشرینی دووەمی وەک ڕۆژی جیهانی كۆتایهێنان بە دیاردەی دەربازبوون لە سزا لەو تاوانانەی بەرامبەر ڕۆژنامەنووسان دەكرێت، دیاریكردووە و داوای لە وڵاتانی ئەندام كردووە ڕێوشوێنی دیاریكراو بۆ بەرگرتن لە بڵاوبوونەوەی فەرهەنگی دەربازبوونی تاوانباران لە سزا بگرنە بەر.

 

ڕاگەیێنراوی فەرمی: کۆمیسیۆنی باڵای مافی مرۆڤ لە عێراق لە ڕاگەیێنراوێکدا کە بەبۆنەی "ڕۆژی جیهانی بۆ کۆتاییهێنان بە دەربازبوون لە سزا لەسەر تاوانەکانی دژی ڕۆژنامەنووسان،" داوا لە سەرجەم دەسەڵاتە نیشتمانییەکان و کۆمەڵگەی مەدەنی دەکات "زیاتر کاربکەن و هەوڵبدەن بۆ جێبەجێکردنی یاسا پەیوەندیدارەکان بۆ پاراستنی ڕۆژنامەنووسان لەو پێشێلکاریانەی بەرامبەریان دەکرێت، ڕێگەیان لێدەگیرێت لەوەی کارەکانیان ئەنجام بدەن و دەستدرێژیان دەکرێتە سەر".

 

چارەسەرەکان: بەگوێرەی ڕاگەیێنراوەکە، کۆمیسیۆنی باڵای مافی مرۆڤ لە عێراق پەرۆشی خۆی دووپات دەکاتەوە لەوەی "گرنگییەکی زۆر بەم بابەتە بدرێت بە گرتنەبەری ڕێوشوێنی پێویست، ئەنجامدانی لێکۆڵینەوەی شەفاف و تۆڵەسەندنەوە لە ئەنجامدەرانی ئەو جۆرە تاوانانە، بەجۆرێک کە ئەمە ڕێوشوێنانە ڕێگرییەکی ڕاستەقینە پێکبهێنێت و گەرەنتی سەلامەتی ڕۆژنامەنووسان بکات".