عێراق پایتەختێکی نوێ بنیات دەنێت

ئاڤا نیوز

 

بەمەبەستی کەمکردنەوەی قەرەباڵغی شەقامەکانی بەغدا و کۆکردنەوەی هەموو وەزارەت و دامەزراوەکانی دەوڵەت لەیەک ناوچەدا، حکومەتی عێراق پڕۆژەیەکی بۆ دروستکردنی شارێک بەناوی پایتەختی کارگێڕی لە باشووری بەغدا زیندوودەکاتەوە، بڕیارە بەمزوانە سوودانی بەردی بناغەی دابنێت.

 

وێنە گەورەکە: بیرۆکەی ئەو پڕۆژەیە بۆ شەش ساڵ لەمەوبەر دەگەڕێتەوە، ئەو کات وەزارەتی پلاندانانی عێراق ئاشکرایکرد، توێژینەوەی کردووە و گەیشتووەتە ئەو دەرئەنجامەی بۆ چارەسەری کێشەی زیادەڕۆیی و قەرەباڵغی شەقامەکانی بەغدا، لەسەر ڕووبەڕی 50 کیلۆمەتری چوارگۆشە شارێک لە باشووری بەغدا دروستبکرێت و هەموو وەزارەتەکانی دەوڵەت و دەیان پڕۆژەی نیشتەجێبوونی نوێی تێدا کۆبکرێتەوە.

 

لێدوانی فەرمی: حەسەن خەفاجی، سەرۆکی لیژنەی وەبەرهێنان و گەشەپێدان لە پەرلەمانی عێراق بە ئاژانسی فەرمی هەواڵی عێراقی ڕاگەیاند، پایتەختی کارگێڕی لەسەر ڕووبەرێکی گەورە لە باشووری بەغدا دروستدەکرێت و بەمزوانە سەرۆکوەزیرانی عێراق بەردی بناغەی پڕۆژەکە دادەنێت.

 

ئەوەشی خستووەتەڕو، شارەکە هەموو وەزارەتەکانی عێراق لە خۆدەگرێت، جگە لەوەی قەرەباڵغی هاتوچۆ لەناو بەغدا کەمدەکاتەوە، کارئاسانی زۆریش بۆ هاووڵاتیان دەکات، چونکە هەموو وەزارەتەکان لەیەکترەوە نزیک دەبن، بڕیاریشە لەماوەی چەند ساڵێکدا پڕۆژەی دروستکردنی ئەو شارە تەواو بکرێت.