دەستەی دەستپاکی لێکۆڵینەوە لە تۆمارە دەنگییەکەی کەریم فەیسەڵ دەکات

ئاڤا نیوز

دەستەی دەستپاکیی عێراق لێکۆڵینەوە لە تۆمارە دەنگییەکەی کەریم فەیسەڵ، سەرۆکی دەستەی ڕاوێژکارانی ئەنجوومەنی وەزیرانی عێراق دەکات کە تێیدا مامەڵەی بەرتیلی لەگەڵ کەسێک دەکرد.

چیرۆکی سەرەکی: چەند ڕۆژێک پێش ئێستا لە تۆڕە کۆمەڵایەتییەکان تۆمارێکی دەنگی کەریم فەیسەڵ بڵاوبووەوە، تیایدا داوای بەرتیل لە کەسێک بە ناوی ئەبو تەها دەکات و بە ملیۆنێک دۆلاریش ڕازی نابێت، ئەوەش لە ماوەیەکی کەمدا کاردانەوەیەکی زۆری لە میدیاکان و تۆڕە کۆمەڵایەتییەکان بەدوای خۆیدا هێنا، دواتر هەواڵی دوورخستنەوەی بڵاوکرایەوە. 

ڕاگەیێنراوی فەرمی: دەستەی دەستپاکیی عێراق بڵاویکردەوە، لەسەر ڕاسپاردەی سەرۆکوەزیران محەممەد شیاع سوودانی و بە هەماهەنگی لەگەڵ دادوەری دادگای ناوەندی تایبەت بە ڕووبەڕووبوونەوەی گەندەڵی، دەستیان کردووە بە لێکۆڵینەوە لەو تۆمارە دەنگییەی دزەی پێکراوە و خاوەندارییەتی بۆ سەرۆکی دەستەی ڕاوێژکاران لە نووسینگەی سەرۆکی ئەنجوومەنی وەزیران دەگەڕێتەوە. لێکۆڵینەوەکە بۆ ئەوەیە ئایا تۆمارە دەنگییەکە بە ژیریی دەستکرد (AI) دروست کراوە یاخود ڕاستەقینەیە.

لەلایەکی دیکەوە: دوای بڵاوبوونەوەی تۆمارە دەنگییەکە، 8ی ئەم مانگە نووسینگەی ڕاگەیاندنی سوودانی ڕاگەیێنراوێکی بڵاوکردەوە و ڕایگەیاند، سکاڵا لەسەر ئەو دەزگا میدیایانە تۆمار دەکەن کە هەواڵی ناڕاست بڵاودەکەنەوە، بەڵام تۆمارە دەنگییەکەی بەفەرمی ڕەت نەکردەوە، تەنانەت بە یەک وشە باسی تۆمارە دەنگییەکە و کەریم فەیسەڵ نەکرابوو.

 

بۆچوونی بەرامبەر: کەریم فەیسەڵ کە لە سەردەمی مالیکییەوە پۆستەکەی وەرگرتووە، ئەوکات تۆمارە دەنگییەکەی ڕەتکردەوە و ڕایگەیاند: "ساختەیە و دوورە لە ڕاستی، سەرۆکوەزیرانیش بڕیاری دوورخستنەوەمی نەداوە".