کامێرای ئاڤا دەچێتە کارگەیەکی گەورەی بەرهەمهێنانی حەبی کەپتاگۆن

ئاڤا نیوز

 

کامێری ئاڤا میدیا دەچێتە ناو گەورەترین کارگەی بەرهەمهێنانی حەبی کەپتاگۆن کە لە ناو کۆشکێک لە سنووری نێوان لوبنان و سووریا دروستکراوە تاوەکو کەس نەزانێت و گومان نەکات.

 

 وێنە گەورەکە: پێش ڕووخانی دەسەڵاتی بەشار ئەسەد، سووریا زۆرینەی کات تۆمەتبار دەکرا بەوەی کە وڵاتەکە بووەتە کارگەی بەرهەمهێنان و گواستنەوەی ماددە هۆشبەرەکان، بەڵام بەهۆی حکومەتی ئەو کاتە ئەو تۆمەتانەی ڕەتدەکردەوە.

 

چیرۆکی سەرەکی: داوای ئەوەی چەکدارانی ئۆپۆزیسیۆنی سووریا توانیان دەسەڵاتی بەشار ئەسەد کۆتایی پێبهێنن و حکومەتی ڕاگوزەر دروست بکەن، چەندین کارگەی بەرهەمهێنان ماددە هۆشبەر و حەبی کەپتاگۆنیان ئاشکرا کرد، کامێرای ئاڤا دەچێتە ناو کارگەیەکی بەرهەمهێنانی کەپتاگۆن لە سووریا و ورد و درشتی گۆشە نەبینراوەکان نیشان دەدات.

 

زانیاریی زیاتر: بە نزیکەی 20 کیلۆمەتر لە سنووری نێوان سووریا و لوبنان، بەدیاریکراوی لە ناوچەی دیماس ڤێلایەکی گەورە دروستکراوە کە کەتیبەی چواری سەربازی ماهیر ئەسەد برای بەشار ئەسەد سەرپەرشتی دەکرد و لە ناو خەڵکیشدا وا بڵاوبوو کە ئەو ڤیلایە شوێنی مانەوەی برای ئەسەدە. 

 

ئەوەی پێویستە بیزانیت: ئاڤا میدیا چەندین جار ڕاپۆرتی لەبارەی ئەوە بڵاوکردەوە کە سووریا ناوچەی بەرهەمهێنانی حەبی هۆشبەرە، دوای ڕووخانی دەسەڵاتی بەشار ئەسەد ئەو پەردە تۆزاوییە کەوتە خوارەوە و دەرکەوت وڵاتەکە کارگەی بەرهەمهێنانی چەندین جۆر لە ماددەی هۆشبەرە، کامێرای ئەمجارە ڕاستی شوێنی بەرهەمهێنانی حەبی کەپتاگۆن دەخاتەڕوو. 

 

شێوازی هەڵگرتنی ماددەکان چۆن بووە؟ 

سەدان بەرمیلی بچووکی لەسەر یەک دانراو و فەردەی پڕ لە حەبە زەرد باوەکە لەناو ئەو کۆشکەدا کۆکراونەتەوە و پارێزگاریان لێکراوە.

 

کارکردن لە کارگەکە تاکەی بەردەوام بووە؟ 

 

چەندین ئامێری گەورە لەناو کارگەکەدا بوون کە لە تێکەڵکردنی چەندین ماددەی سەرەتایی حەبی کەپتەگۆنیان بەرهەمهێناوە و ئامێرەکان تاوەکو کۆتا ساتەکانی کەوتنی دەسەڵاتی ئەسەد کاریان کردووە کە توانای بەرهەمهێنانی دەیان تۆن حەبی کەپتەگۆنیان هەبووە. 

 

لەلایەکی دیکەوە: لە ڕاپۆرتی نووسینگەی نەتەوەیەکگرتووەکان بۆ ماددە هۆشبەرەکان و تاوانەکان باس لەوە کراوە، ناوچەی دەرچوونی حەبی کەپتەگۆن سووریا و لوبنانە و لە ڕێگەی وشکانی یاخود دەریاییەوە بە ناڕاستەوخۆ ماددەکان گوێزراونەتەوە بۆ عەرەبی و ناوچەکانی تر.