ئێران: لەبەرامبەر هەڵگرتنی سزاکان دانووستان لەسەر بەرنامە ئەتۆمییەکەمان دەکەین

ئاڤا نیوز 

 

ئێران دەیەوێت لەگەڵ دەستبەکاربوونی دۆناڵد ترەمپ، سەرۆکی هەڵبژێردراوی ئەمریکا، دانووستان لەسەر بەرنامە ئەتۆمییەکانی دەستپێبکاتەوە بەڵام بۆ گفتوگۆکان مەرجی هەیە. 

 

وێنە گەورەکە: بەهۆی بەردەوامی بەرنامە ئەتۆمییەکەی ئێران، ئەمریکا و وڵاتانی ئەندام لە یەکێتی ئەوروپا گەمارۆی قورسی ئابوورییان بەسەر ئەو وڵاتەدا سەپاندووە کە بەهۆیەوە ڕووبەڕووی قەیرانێکی سەختی دارایی بوونەتەوە لە ناوخۆی وڵاتەکەدا و بەهای دراوەکەی بۆ خراپترین ئاست دابەزیوە. 

 

لێدوانی فەرمی: عەباس عێراقچی، وەزیری دەرەوەی ئێران لە چاوپێکەوتنێکی تەلەفزیۆنیدا ڕایگەیاند: ئامادەین بێ دواکەوتن، بگەڕێینەوە بۆ دانووستانەکانی تایبەت بە بەرنامە ئەتۆمییەکەمان، بەڵام دانوستانێک ئامانجەکەی ڕێککەوتن بێت.

عەباس عێراقچی ڕایگەیاندووە، "وڵاتەکەی ئامادەیە بۆ دەستپێکردنەوەی گفتوگۆکان لەسەر بەرنامە ئەتۆمییەکەی بە ئامانجی ئەوەی بگەنە ڕێککەوتن، لە ئێستادا قەیرانێک لە ڕۆژهەڵاتی ناوەڕاستدا هەیە، بەڵام ڕێگا دیبلۆماسییەکان دانەخراون و چارەسەرکردنی دۆخەکە قورسە بەڵام مەحاڵ نییە".

 

باکگراوند: بارودۆخی ڕۆژهەڵاتی ناوەڕاست ناڕوونە و ئێران دەیەوێت لەگەڵ دۆخی ئێستا و دوای نەمانی ڕژێمەکەی بەشار ئەسەد خۆی بگونجێنێت و هەنگاوبنێت بۆ هەڵگرتنی سزاکانی سەر وڵاتەکەی، لەڕێگەی دەستپێکردنەوەی گفتوگۆکانەوە لەسەر بەرنامە ئەتۆمییەکەی سزاکان لابەرێت.

 

بەتەنیشت ئەم بابەتەوە: پێشتر ئاژانسی هەواڵی ئیسنای نیمچە فەرمی ئێران، بە پشتبەستن بە لێدوانی جێگری وەزیری دەرەوەی ئێران بڵاویکردبووەوە، خولی داهاتووی دانووستانە ئەتۆمییەکان لەگەڵ وڵاتانی بەریتانیا، فەرەنسا و ئەڵمانیا لە 13-1-2025 بەڕێوەدەچێت لە جنێفی پایتەختی سویسرا.