سووریا ڕووبەڕووی قەیرانی ئاو دەبێتەوە

ئاڤا نیوز

 

بەهۆی کۆنترۆڵکردنی سەرچاوەکانی ئاو وەکو ڕووبار و کانیاوەکان لەلایەن بەشێک لە وڵاتانی دراوسێی سووریا، وڵاتەکەی تووشی قەیرانێکی گەورەکەی کەمئاوی کردووە. 

 

زانیاریی بەدەستهاتوو: سەرەڕای ئەوە وڵاتەکە حەوت ناوچەی پارێزبەندی ئاوی هەیە و 16 ڕووباری سەرەکی بەنێو خاکەکەی تێپەڕ دەبێت و نۆ دەریاچەشی هەیە، بەڵام بەهۆی گرتنەوەی سەرچاوەکانی ئاو لەلایەن وڵاتانی دراوسێیەوە بە تایبەت تورکیا و ئیسرائیل، وڵاتەکە خراوەتە ناو لیستی یەکێک لە هەژارترین وڵاتانی جیهان کە گرفتی کەمئاویان هەیە و ئەمەش کاریگەریی خراپی لەسەر کشتوکاڵکردن داناوە. 

 

ئەوەی پێویستە بیزانیت: حکومەتی تورکیا دەیان بەنداوی لەسەر ڕێڕەوە ئاوییەکان دروستکردووە، هاوکات بەردانەوەی ئاوی ڕووباری فوڕاتی بۆ کەمتر لە یەک لەسەر سێی ڕێککەوتنی ئەنقەرە و دیمەشق کەمکردووەتەوە، بەهەمان شێوە سەرچاوەکانی ئاو و کانیاوی لە ناوچەکانی عەفرین و حەسەکە کۆنتڕۆڵ کردووە.

 

زانیاریی زیاتر: لە باشووری سووریاش، ئیسرائیل دەریاچەی تەبەریای کۆنتڕۆڵ کردووە هاوکات دەستی بەسەر بەرزاییەکانی جۆلانیشدا گرتووە کە خاوەنی یەدەگێکی باشی ئاوی ژێرزەوییە و 20 کانیاوش لەناوچەکە هەن، هەروەها دەستی بەسەر ڕووباری یەرمووک و بەنداوی وەحدە و کانیاوەکانی چیای شێخ حەمروون و ڕووبارەکانی حاسبانی و بانیاسدا گرتووە.

 

ئەمەش بزانە: لە چەند ڕۆژی ڕابردوودا، سوپای ئیسرائیل بەنداوی مەنتەڕەی لە بەرزاییەکانی جۆلان کۆنترۆڵ کرد کە یەکێکە لە گورەترین بەنداوەکانی سووریا و سەرچاوەی ئاوی خواردنەوەی شارەکانی قونەیتەرە و ناوچەکانی دەورووبەری تاوەکو شاری دەرعا دابین دەکات.