ئاوات شێخ جەناب: کێشەی مووچە کۆتایی هات

ئاڤا نیوز

دوای پێنج ڕۆژ مانەوە لە بەغدا و چەندین دانیشتن لەنێوانیان، سەرەنجام وەزیری دارایی و ئابووری هەرێمی کوردستان چارەسەرکردنی کێشەی مووچەی فەرمانبەرانی بۆ ساڵی 2025 ڕاگەیاند.

وێنە گەورەکە: لە ساڵی 2014ـەوە حکومەتی عێراق پشکی بودجەی هەرێمی کوردستانی بڕیووە، بەو هۆیەوە مانگانە مووچەی فەرمانبەران دوادەکەوێت.

لێدوانی فەرمی: ئێوارەی ئەمڕۆ دووشەممە، ئاوات شێخ جەناب، وەزیری دارایی و ئابووری لە کۆنگرەیەکی ڕۆژنامەوانی لە بەغدا ڕایگەیاند، لەماوەی پێنج ڕۆژی مانەوەی شاندی هەرێمی کوردستان و چەندین دانیشتن لە بەغدا ڕایدەگەیێنین، بۆ ساڵی 2025 کێشەی مووچەی فەرمانبەران کۆتایی هات.

ئاوات شێخ جەناب لە کۆنگرە ڕۆژنامەوانییەکە ئەمانەشی وت:

- لەگەڵ دەستبەکاربوونی کابینەی نۆیەم ئامانجی سەرۆک وەزیران مەسرور بارزانی ئەوەبوو، کێشەکان لەگەڵ بەغدا سفر بکرێنەوە، هاوکات ڕاسپاردەی سەرۆکی حکومەت بوو لەگەڵ بەغدا ڕێککەوتن بکرێت.

- لەماوەی یەک تا دوو ڕۆژی داهاتوو ئامادەکاری دەکرێت بۆ دابەشکردنی مووچەی مانگی یەکی ئەمساڵ.

بۆچی گرنگە: ڕێککەوتنی نێوان هەرێمی کوردستان و بەغدا لەبارەی مووچەی فەرمانبەران دەبێتە هۆکاری دڵنیایی بۆ مووچەخۆران و ڕۆڵی دەبێت لە بوژانەوەی بازاڕ.

لەلایەکی دیکەوە: ڕۆژی 2025-02-02، پەرلەمانی عێراق دەنگیدا لەسەر هەموارکردنەوەی ماددەی 12 بڕگەی (ج) لە یاسای بودجە، کە پەیوەستە بە تێچووی دەرهێنان و هەناردەکردنی نەوتی هەرێمی کوردستان، بڕیارە لە نزیکترین کات نەوتی هەرێمی کوردستان هەناردە بکرێتەوە.