دەیان بەرپرس و هەزاران عێراقی ڕوو لە لوبنان دەکەن

ئاڤا نیوز

دەیان بەرپرس و هەزاران هاووڵاتی عێراقی بە مەبەستی بەشداریکردن لە ڕێوەڕەسمی ملیۆنی بەخاکسپاردنی ئەمینداریی پێشووی حیزبوڵڵا ڕوو لە بەیرووتی پایتەختی لوبنان دەکەن.

وێنە گەورەکە: ئامادەکارییەکانی حیزبوڵڵای لوبنان بۆ بەخاکسپاردنی حەسەن نەسروڵڵا لە بەیرووت و هاشم سەفیەدینی شوێنگرەوەی لە باشووری لوبنان بەردەوامە، بۆ ئەو مەبەستەش یەکشەممەی داهاتوو ڕێوڕەسمێکی ملیۆنیی ڕێکدەخرێت.

زانیاریی بەدەستهاتوو: بەگوێرەی هەواڵێکی ئاژانسی فرانس پرێسی فەرەنسی، لەگەڵ نزیکبوونەوەی وادەی ڕێوڕەسمی بەخاکسپاردنی حەسەن نەسروڵڵا لە لوبنان. گەشتەکانی هێڵی ئاسمانیی عێراقی و هاوکات هێڵی ئاسمانی شەرقولئەوسەتی لوبنان، بەتەواوی پڕن.

زانیاریی زیاتر: ئاژانسەکە لە زاری بەرپرسێکی هێڵی ئاسمانی عێراقییەوە ئەوەی ڕاگەیاندووە، "هەموو کورسییەکانی گەشتەکانی هێڵی ئاسمانی عێراقی لە بەغداوە بۆ بەیروت گیراون"، هاوکات سەرچاوەیەک لە هێڵی ئاسمانی شەرقولئەوسەتی لوبنان ڕایگەیاندووە، گەشتەکانی نێوان بەغدا و بەیروت لە هەینییەوە دەستپێدەکات تا ڕۆژی سێشەممە.

- بەرپرسێکی عێراقیش بە ئاژانسەکەی ڕایگەیاندووە، چاوەڕوان دەکرێت پەرلەمانتاران و بەرپرسانی عێراقی بە تایبەت بەشداری پرسەکەی نەسروڵڵا بکەن، هاوکات چاوەڕوان دەکرێت نوێنەری گرووپە چەکدارییە عێراقییەکانیش بەشداری ڕێوڕەسمەکە بکەن. بڕیاریشە بۆ ماوەی چوار کاتژمێر لە کاتی بەڕێوەچوونی ڕێوەڕەسمەکە فڕۆکەخانەی بەیروت دابخرێت.

ئەوەی پێویستە بیزانیت: 27ی ئەیلوولی ساڵی ڕابردوو حەسەن نەسروڵڵا، ئەمینداری پێشووتر و 3ی تشرینی دووەمیی هەمان ساڵیش هاشم سەفیەدینی، ئەمینداری پێشووی حیزبوڵڵای لوبنان، لە ئەنجامی بۆردوومانی چڕی فرۆکە جەنگییەکانی ئیسرائیل بۆ سەر ناوچەکانی باشووری بەیرووتی پایتەخت کوژران و لەو کاتەوە تا ئێستا لە شوێنێکی نهێنیی و بەشێوەیەکی کاتی بەخاکسپێردراون، بڕیاریشە 23ی ئەم مانگە هەردووکیان لە ڕێوڕەسمێکی فەرمیدا بە خاک بسپێردرێن.

لەلایەکی دیکە: حیزبوڵڵا ڕایگەیاند، 79 وڵات بەشداری یادەکە دەکەن، چ لەسەر ئاستی فەرمی و حکومی بێت یان لە ڕێگەی جەماوەرییەوە.

ئەمەش بزانە: لە سبەی 20ی شوباتەوە، هێڵی ئاسمانیی عێراقی گەشتەکانی بۆ لوبنان دوو هێندە دەکات بۆ دوو گەشت لە ڕۆژێکدا، ئەمەش پێش پرسەی نەسروڵڵا لە 23ی شوباتدا.