گیاندارە سەیرەکەی چیای سەفین چییە؟

ئاڤا نیوز

دوێنی ئاڤا میدیا ڤیدیۆی  گیاندارێکی سەیر و دەگمەنی لەنێو بەفر بڵاوکردەوە، ڤیدیۆکە لەلایەن هاونیشتمانییەک لە چیای سەفینی خۆشناوەتی لە سنووری هەولێر تۆمارکرابوو، بەدواداچوونمان بۆ ناسنامەی گیاندەارەکە کرد بزانین چییە؟

چیرۆکی سەرەکی: گیاندارەکە لە جۆری خشۆکە و نێماتۆمۆرفایە، کە هەندێکجار پێی دەوترێت گۆردیاسیا، بە شێوەیەکی باو بە کرمی مووی ئەسپ ناسراوە و مشەخۆرە، لە ڕووکەشیشدا هاوشێوەی کرمەکانن، زۆربەی جۆرەکان قەبارەیان لە نێوان 50 بۆ 100 ملیمەترە، لە هەندێک حاڵەتدا دەگاتە 2 مەتر و تیرەکەیان 1 بۆ 3 ملیمەتر دەبێت، دەتوانرێت لە شوێنە شێدارەکانی وەک کانیاوەکان و بەفردا بدۆزرێتەوە.

کاردانەوەکان: ڤیدیۆکە سەدان هەزار بینەری هەبووە، خەڵکێکی زۆر پرسیاریان دەکرد دەبێ چی بێت، کەسێکی تریش ڤیدیۆی دیکەی هەمان گیانداری لە کۆمێنتی ئاڤا دانابوو دەیوت شۆک بوونە و هەر کەسێک تا بە چاوی خۆی نەیبێنێت بڕوا ناکات شتی هێندە سەمەرە لە سروشت هەبێت، کەسێکی تریش نووسیبووی لە ناوچەی پڕژێی باڵەکایەتی زۆرە، ئەو شوێنەیە هاوینانیش بەفری لێ نابڕێت.

لێدوانی فەرمی: د. ڕێزان مەحموود، مامۆستای بەشی بایۆلۆجی لە زانکۆی سلێمانی بە ئاڤا میدیای ڕاگەیاند: نێماتۆمۆرفاکان جۆریان زۆرە، زۆربەی ژیانیان لەنێو جەستەی حەشەراتەکاندایە و تەنیا بەشێکی ژیانیان لە دەرەوەیە و مرۆڤەکان دەیبینن.

زانیاریی زیاتر: کاتێک ئەم کرمە لە ژینگەیەکدا دەردەکەوێت، ئاماژەیە بۆ ئەوەی خاکەکە سەلامەت و بەپیتە. بەڵام هەموو جۆرەکانی ئەم کرمە سوودبەخش نین و زۆربەیان وەک مشەخۆر دەژین.

ئەمەش بزانە: نێماتۆمۆرفاکان لە ئاودا زاوزێ دەکەن، بە سەرچاوەیەکی گرنگی گواستنەوەی وزە لە خاکەوە بۆ نێو ئاو دادەنرێن.