شێخ دارا: ناوەڕاستی ئەم هەفتەیە بەفر و باران دەستپێدەكاتەوە

ئاڤا نیوز

 

كەشناسی عێراق ڕایدەگەیەنێت، ئەو شەپۆڵە ساردییەی ڕووی لە عێراق كردبوو، كۆتایی هات و لە ئەمڕۆ شەممەوە كاریگەرییەكەی نامێنێت.

 

وێنە گەورەكە: ماوەی هەفتەیەك شەپۆڵێكی بەفر و بارانبارین و سەرما و سۆڵە هەرێمی كوردستان و عێراقی گرتەوە و پلەكانی گەرما لە زۆربەی ناوچەكان بۆ خوار سفری سەدی دابەزی.

 

ڕاگەیێنراوی فەرمی: دەستەی بەدواداچوونی كەشناسی و بوومەلەرزەزانی عێراق لە ڕاگەیێنراوێكدا ئاماژەی بەوەكرد، "لە ئەمڕۆ شەممەوە پلەكانی گەرما دەستدەكەن بە بەرزبوونەوە و ئەو شەپۆڵە سەرمایەی كاریگەریی لەسەر تەواوی عێراق دروستكردبوو، كۆتایی هات."

 

ئەوەی پێشبینی دەكرا: پێشتر شێخ دارا، پێشکەشکاری کەشوهەوا لە ئاڤا میدیا، ڕایگەیاند:

- ڕۆژی پێنجشەممە کۆتا ڕۆژی شەپۆلی جەمسەری باکوورە لە ناوچەکانی هەرێمی کوردستان و ڕۆژهەڵاتی ناوەڕاست، دوای ئەوە لە ڕۆژانی شەممە و یەکشەممە پلەكانی گەرما بە ڕاددەیەكی نزم بەرز دەبنەوە.

- ڕۆژی سێشەممە، شەپۆلێکی دیكەی بەفر و بارانبارین ڕوو لە ڕۆژهەڵاتی ناوەڕاست، بەتایبەت هەرێمی کوردستان و سووریا دەکات.

 

زانیاریی زیاتر: كەشناسی عێراق پێشبینی دەكات، پلەكانی گەرما لە شارەكانی ناوەڕاست و خوارووی عێراق لە ئاستی مامناوەند بێت، بەڵام لە ناوچەكانی هەرێمی كوردستان و پارێزگاكانی ڕۆژئاوای عێراق بە ڕێژەیەكی كەمتر بەرز ببێتەوە.