وەزارەتی نەوت: نزیکین لە هەناردەکردنەوەی نەوت لە ڕێگەی جەیهانی تورکیاوە

 

ئاڤا نیوز

بە گوتەی وەزیری نەوتی عێراق، نزیکن لە کاراکردنەوەی دۆسیەی هەناردەکردنەوەی نەوتی هەرێمی کوردستان لە ڕێگەی بۆری نەوتەوە بۆ بەندەری جەیهانی تورکیا و ئەگەری زیادبوونی هەناردەکردنی بە نەوتی بەسرەش لەو ڕێگەیەوە هەیە.

چیرۆکی سەرەکی: حەیان عەبدولغەنی، جێگری سەرۆکوەزیران بۆ کاروباری وزە و وەزیری نەوت ئەمڕۆ پێنجشەممە، سەرۆکایەتی کۆبوونەوەی لیژنەی هاوبەشی عێراق - تورکیای کرد بە ئامادەبوونی ئەندامانی لیژنەکە لە وەزارەتەکانی عێراق.

ڕاگەیێنراوی فەرمی: بە گوێرەی ڕاگەیێنراوی وەزارەتی نەوت، وەزیری نەوت جەختی له گرنگی دۆسیەکانی پەیوەست بە کارەکانی لیژنەکه کردەوە بە تایبەتی دۆسیەکانی ئاو و نەوت.

بەشێکی دیکە لە قسەکانی وەزیری نەوت:

٠ ئاماژەی بە پێویستی کاراکردنی دۆسیەی ئاو بە شێوەیەک کرد کە خزمەت بە بەرژەوەندییەکانی عێراق بکات لەڕێگەی بەدەستهێنانی پشکێکی دادپەروەرانەی ئاو.

٠ نزیکین لە کارکردنەوەی دۆسیەی هەناردەکردنەوەی نەوت لە ڕێگەی بۆری نەوتی تورکیاوە بۆ بەندەری جەیهانی تورکیا و ئەگەری زیادکردنی هەناردەکردنی بە نەوتی بەسرە لە ڕێگەی ئەم بۆریەوە هەیە.

ئەوەی پێویستە بیزانیت: بڕیارە دوای نیوەڕۆی ئەمڕۆ پێنجشەممە کۆبوونەوەی سێ قۆڵی بە ئامادەبوونی شاندی حکومەتی هەرێمی کوردستان و نوێنەری کۆمپانیاکانی بەرهەمهێنانی نەوت لە هەرێمی کوردستان لەگەڵ وەزارەتی نەوتی عێراق بە ئامانجی نەهێشتنی بەربەستەکانی بەردەم پرۆسەی هەناردەکردنەوەی نەوتی هەرێمی کوردستان بەڕێوەبچێت.