گەنەل ئینێرجی: هەوڵەکان بۆ هەناردەکردنەوەی نەوتی کوردستان بەردەوامن

ئاڤا نیوز

کۆمپانیای گەنەل ئینێرجی ڕایگەیاند، هەوڵەکان بۆ هەناردەکردنەوەی نەوتی هەرێمی کوردستان بەردەوامە، هاوکات پێشبینی دەکرێت ساڵی 2025 بەرهەمی کێڵگەی تاوکێ زیاد بکات.

وێنە گەورەکە: تاوەکو ئێستا حکومەتی عێراق گڵۆپی سەوزی بۆ دەستپێکردنەوەی هەناردەی نەوتی هەرێمی کوردستان هەڵنەکردووە، لەکاتێکدا هەریەک لە حکومەتی هەرێمی کوردستان و حکومەتی تورکیا تەنانەت کۆمپانیاکانی بەرهەمهێنی نەوتیش ئامادەیی خۆیان دەربڕیوە.

لێدوانی فەرمی: پۆڵ وێر، بەڕێوەبەری جێبەجێکاری کۆمپانیای گەنەل ئینێرجی ڕایگەیاند:

- بەراورد بە ساڵی 2023، لە ساڵی 2024 پێشکەوتنی زیاترمان هەبووە و گۆڕانکاریمان ئەنجامداوە، پێشبینی دەکەین لە ساڵی 2025 بەرهەممان لە کێڵگەی تاوکێ لە هەرێمی کوردستان زیاد بکات.

- بۆ ساڵی 2025، سەرنجمان لەسەر سێ ئامانجی سەرەکی دەبێت: پاراستنی باڵانسێکی بەهێز، درووستکردنی پارەی نەختینەیی و زیادکردنی سەروەت و سامانی نوێ.

- لە هەرێمی کوردستان بەردەوامین لە کارکردن لەگەڵ هاوتاکانمان بۆ دەستپێکردنەوەی هەناردەکردنی بەرهەمی نەوت بە مەرجی دروست بۆ دڵنیابوونەوە لە جێبەجێکردنی گرێبەستەکانمان و ئەوەی کە شایەنمانە پێمان بدرێت.

- کۆمپانیاکەمان 107 ملیۆن دۆلاری لە حکومەتی هەرێمی کوردستانەوە وەرگرتووە کە پارەی ماوەی فرۆشی نەوتی ساڵانی پێشووە.

- کۆمپانیاکەمان نزیکەی 50 ملیۆن دۆلار قەرزاری حکومەتی هەرێمە. ئێمە بەردەوامین لە کارکردن بۆ پلانێک بۆ دانەوە یان یەکلاکردنەوەی ئەو بڕە پارانەی کە قەرزن.

- لەم ساڵدا کاردەکەین بۆ وەرگرتنەوەی ئەو بڕە پارەیەی حکومەتی هەرێمی کوردستان قەرزاری کۆمپانیاکەمانە.

ئەوەی پێویستە بیزانیت: لە ماوەی ڕابردوودا حەیان عەوبدولغەنی، وەزیری نەوتی عێراق ڕایگەیاندبوو؛ بەم نزیکانە هەناردەکردنەوەی نەوتی هەرێمی کوردستان دەستپێدەکاتەوە، هاوکات تورکیاش ئامادەیی خۆی بۆ وەرگرتنی نەوتی هەرێـمی کوردستان دەربڕیوە.

باكگراوند: دوای هەموارکردنەوەی ماددەی 12 لە یاسای بودجە لە پەرلەمانی عێراق، هێشتا ئاستەنگەکانی بەردەم هەناردەکردنەوەی نەوتی کوردستان ماون و چاوەڕێ دەکرێت بەمنزیکانە گرفتەکان کۆتاییان بێت.