ئۆزگور ئۆزێل بە دەنگی هەزار و 171 کەس وەک سەرۆکی جەهەپە هەڵبژێردرا

 

ئاڤا نیوز

ئەمڕۆ 21ـیەمین کۆنگرەی نائاسایی جەهەپە لە ئەنقەرە بەڕێوەچوو، لە نێو سێ کاندید، ئۆزێل وەک تاکە کاندید مایەوە و بە دەنگی هەزار و 171 ئەندام لە کۆی 1276دەنگ، جارێکی دیکە وەک سەرۆکی جەهەپە هەڵبژێردرا.

وێنە گەورەکە: لەدوای دەستگیرکردنی ئەکرەم ئیمامئۆغلو، سەرۆکی گەورەشارەوانی ئیستەنبووڵ، لەکەناڵە فەرمییەکانی حکومەتەوە چەند بەڵگەیەک بڵاوکرایەوە بەوەی ئۆزگور ئۆزێل، سەرۆکی جەهەپە ڕەشوەی بە ئەندامەکان داوە بۆ ئەوەی دەنگی پێبدەن، ئەمەش پۆستی سەرۆکی جەهەپەی خستە مەترسییەوە، هەر بۆیە جەهەپە خێرا ئەم کۆنگرەیەی بەست بۆ ئەوەی کورسی ئۆزگور ئۆزێل، سەرۆکی جەهەپە لە دانانی قەییووم لە شوێنەکەی بپارێزرێت.

چی ڕوویدا: بێرهان شیمشێک، بەهۆی ئەوەی تەنیا پێنج خوولەک دواکەوت، ڕێگەیان نەدا ببێتە کاندیدی سەرۆکی جەهەپە، ئەمەش گرژی لە ناو کۆنگرەکە دروست کرد و لەگەڵ ئۆزێل مشتومڕ لە نێوانیان دروست بوو.

 

لێدوانی فەرمی: شیمشێک وتی: لەکاتێکدا من لەسەر دیوارەکان جەهەپەم دەنووسی، ئۆزگور ئۆزێل، بە پانتۆڵێکی کورتەوە دەسوڕایەوە.

ئەوەی پێویستە بیزانیت: لە کۆنگرەکەدا، ئۆزێل تاکە کاندید مایەوە، ناوی دوو کاندیدی دیکەی لەگەڵدابوو ئەویش ڕێگەیان پێنەدرا خۆیان کاندید بکەن، بە هەزار و 171 دەنگ، جارێکی دیکە وەک سەرۆکی جەهەپە هەڵبژێردرا.