ئوردن کۆمەڵەی ئیخوان موسلمینی هەڵوەشاندەوە

ئاڤا نیوز

بە بڕیاری وەزیری ناوخۆی ئوردن چالاکییەکانی ئیخوان موسلمین لە ئوردن قەدەغە کرا و سەرجەم نووسینگەکانیشیان لەو وڵاتە دادەخرێت و دەستبەسەر موڵکەکانیشیاندا دەگیرێت.

چیرۆکی سەرەکی: ئیخوان موسلمین کۆمەڵەیەکی ئیسلامی ڕامیاریی سوننییە و بنکەی لە بەشێک لە وڵاتانی عەرەبی و جیھاندا ھەیە، لە ساڵی 1928ـەوە لەلایەن حەسەن بەننا لە میسر دامەزرا. کاریگەری ئایدۆلۆژیای بەننا و ئیخوان لە سنووری میسر تێپەڕیداوە و بەسەر چەندین ڕێکخراوی ئیسلامی خێرخوازیی و ڕامیاریی باڵی کێشاوە.

لێدوانی ڕۆژنامەوانی: مازن فرایە، وەزیری ناوخۆی ئوردن لە کۆنگرەیەکی ڕۆژنامەوانییدا ڕایگەیاند: بەگوێرەی دەرئەنجامی لێکۆڵینەوە ئەمنییەکان، دەرکەوت کە ئەندامانی ئەم کۆمەڵەیە دەستیان هەبووە لەو چالاکییانەی کە ئامانج لێی نانەوەی ئاژەوەگێڕی بووە بۆ سەر ئاسایشی نیشتمانی، لەنێویاندا هەڵگرتنی تەقەمەنی و چەک لەنێو گەڕەکانی نیشتەجێبوون و پلانی بە ئامانجگرتنی پێگە هەستیارەکانی وڵات.

ئەوەی پێویستە بیزانیت: ڕۆژی 15ـی ئەم مانگە هەواڵگریی ئوردن پووچەڵکردنەوەی پیلانگێڕییەکی ڕاگەیاند کە ئامانج لێی تێکدانی ئاسایشی نیشتمانی و هاندان بۆ ئاژاوەگێڕی و تێکدانی دۆخی ناوخۆی شانشینی ئوردن بووە.

زانیاریی زیاتر: ئەوکات دەزگای هەواڵگریی گشتیی ئوردن لە ڕاگەیێنراوێکدا ئاماژەی بۆ ئەوە کردبوو، دەزگاکەیان 16 کەسیان دەستگیرکردووە کە تێوەگلاون لەو پیلانانەدا کە لە ساڵی 2021ـەوە بە وردی لەلایەن دەزگاکەیانەوە چاودێریی کراون.