ئیسرائیل هێرشی ئاسمانی دەکاتە سەر هێزە ئەمنییەکانی سووریا

ئاڤا نیوز

شەڕ و ڕووبەڕووبوونەوەی گرووپە چەکدارە درووزییەکان لەگەڵ هێزە ئەمنییەکانی سووریا لە چەند ناوچەیەکی پارێزگای ریفی دیمەشق بەردەوامە و ئیسرائیلیش لە ڕێگەی هێرشی ئاسمانییەوە هێزە ئەمنییەکانی سووریا دەکاتە ئامانج.

 

‏‎ئەوەی پێویستە بیزانیت: بەهۆکاری ئەوەی کەسێکی دروز بێڕێزی بە پێغەمبەری ئیسلام (د.خ) کردووە، لە دوێنێوە لە دوو ناوچەی سەر بە پارێزگای ریفی دیمەشق شەڕ و پێکدادان لەنێوان گرووپەکانی سەر بە حکومەتی سووریا و چەکدارانی دروز بەردەوامە.

 

زانیاریی بەدەستهاتوو: بەگوێرەی چەند سەرچاوەیەک بۆ کەناڵی جەزیرە، دەنگی چەند تەقینەوەیەکی بەهێز لە دیمەشق و دەوروبەری بیستراون و هاوکات فڕۆکە جەنگییەکانی ئیسرائیل سێ ناوچەی ئەمنییان لە ناوچەی سەحنایا لە ڕیفی دیمەشق کردووەتە ئامانج، بەهۆیەوە ژمارەیەک لە ئەندامانی هێزە ئەمنییەکانی سووریا کوژراون.

 

ژمارەکان وادەڵێن: بەگوێرەی ڕوانگەی سووریی بۆ مافەکانی مرۆڤ، بەهۆی شەڕ و پێکدادانەکانەوە تائێستا 16 کەس کوژراون و 15ی دیکەش برینداربوون، هاوکات هێزەکانی ناوخۆش بۆ کۆنتڕۆڵکردنی گرژییەکان لە ناوچەی جەرەمانا و ئەشرەفیە سەحنایا بڵاوەیان پێکراوە.