پۆلیسی ژینگەی سلێمانی 27 کەس بەهۆی ڕاوە ماسییەوە دەستگیر دەکات

ئاڤا نیوز

بەتۆمەتی ڕاوکردنی ماسی، 27 هاووڵاتی دەستگیر دەکرێن، بەرپرسی ڕاگەیاندنی پۆلیسی دارستان و ژینگەش لەوبارەیەوە دەڵێت "بەپێی شێوازی ڕاوکردنەکە پێبژاردن بە ڕاوچییەکان دەکرێت".

چیرۆکی سەرەکی: ڕۆژی یەکشەممە، تیمەکانی بەشی پۆلیسی دارستان و ژینگەی سەیدسادق دوو هاووڵاتیان لەسەر دەریاچەی دەربەندیخان دەستگیرد، کە سەرقاڵی ڕاوکردنی ماسی بوون. توانراوە دەست بەسەر تۆڕێکی ماسیشدا بگیرێت.

لێدوانی فەرمی: عەمید هێمن کەمەرخان، بەرپرسی ڕاگەیاندنی پۆلیسی دارستان و ژینگەی پارێزگای سلێمانی بە ئاڤا میدیای ڕاگەیاند: ئەو کەسانەی لەسەر ڕاوە ماسی دەستگیر دەکرێن بۆ ماوەی ڕۆژێک تا دوو ڕۆژ بەند دەکرێن، دواتر بە کەفالەت ئازاد دەکرێن، بەڵام ڕۆژی دادگایکردنیان پێبژاردنیان پێ دەکرێت.

زانیاریی زیاتر: بە گوتەی کەمەرخان، ئەو کەسانەی بە تۆڕ و قولاب ڕاو دەکەن، ئەگەر لە کاتی قەدەغەی ڕاو بێت، ئەوا 100 تا 150 هەزار دینار پێبژاردنی پێدەکرێت، ئەگەر ڕاوەکە بە تەزووی کارەبا و ماددەکانی تەقەمەنی بکرێت، ئەوا 200 تا 250 هەزار دینار پێبژاردن بە ڕاوچییەکە دەکرێت.

لەلایەکی دیکەوە: لە سەرەتای ئەم هەفتەیەدا بنکەی پۆلیسی دارستان و ژینگەی تەکییە و شۆڕش لە قەزای چەمچەماڵ، توانیویانە 25 کەس لە کاتی ڕاوە ماسی دا دەستگیر بکەن، هەروەها دەست بەسەر ماسییە ڕاوکراوەکان و ژمارەیەک ئامرازی ڕاوکردندا بگرن.

باکگراوند: لە ڕۆژی 2025-03-10، بڕیاری قەدەغەی ڕاوە ماسی لە هەرێمی کوردستان چووەتە بواری جێبەجێکردنەوە، بڕیارەکە تا 2025-06-20، بەردەوام دەبێت.