جۆ بایدن نایەوێت تیكتۆك بەتەواوەتی قەدەغە بكات

ئاڤا نیوز

جێگری سەرۆكی ئەمریكا دەڵێت، جۆ بایدن بەنیاز نییە تیكتۆك بەتەواوەتی قەدەغە بكات، بەڵام نیگەرانە لە زۆری ژمارەی بەكارهێنەران و بازرگانیكردن لەڕێگەی ئەو تۆڕە کۆمەڵایەتییەوە.

وێنە گەورەكە: ئێستا یەكێك لە پرسە گەرمەکان لە ناوەندە گرنگەکانی ئەمریكا قەدەغەكردنی تیكتۆكە و دەنگی ناڕەزایەتی دژی ئەم تۆڕە بەرزە.

ئەوەی پێویستە بیزانیت: كۆشكی سپی داوای لە ئەنجوومەنی سینات كردبوو پرۆژەیاسایەک دژی تیکتۆک پێشکەش بکەن، نێوەڕاستی ئەم مانگە لە ئەنجوومەنی نوێنەران بە پشتیوانی زۆرینەی هەردوو پارتی کۆماری و دیموکرات  پەسەند کرا، بەڵام هێشتا لە ئەنجوومەنی سیناتدا بەرەوپێش نەچووە.

لێدوانی فەرمی: كەمالا هاریس، جێگری سەرۆكی ئەمریكا دەڵێت: بایدن نیازی نییە تیكتۆك بەتەواوەتی قەدەغە بكات، بەڵام بەتەواوەتی نیگەرانە لەو ڕاپۆرتانەی پێی دەگەن لەبارەی زۆری ژمارەی بەكارهێنەران و ئەو بازرگانییە گەورەیەی لەڕێگەیەوە دەکرێت، هەروەها ترسی هەیە لەو پرسانەی پەیوەستن بە ئاسایشی  نیشتیمانی ڕۆڵی نەرێنی هەبێت.

ژمارەكان وادەڵێن: تیکتۆک نزیکەی 170 ملیۆن بەکارهێنەری هەیە لە ئەمەریکا و ساڵی ڕابردوو 16 ملیار دۆلاری لەو وڵاتە بەدەستهێناوە.

ئەمەش بزانە: وەزارەتی گەیاندنی عێراق لە هەوڵدایە تیکتۆک لە عێراق قەدەغە بکات، بەڵام حکومەتی هەرێمی کوردستان دەڵێت ئەم بڕیارە کوردستان ناگرێتەوە.