كارەكانی دروستكردنی بەنداوی چەق چەق لە سلێمانی دەستپێدەكاتەوە

ئاڤا نیوز

كارەكانی دروستكردنی بەنداوی چەق چەق دەستپێدەكاتەوە، حكومەتی هەرێمی كوردستانیش ڕەزامەندی گەورەتركردنی بەنداوەكە و زیادكردنی بودجەی پرۆژەكەی داوە.

چیرۆكی سەرەكی: ئەمڕۆ پێنجشەممە 14-8- 2025، بە بەشداری وەزیری كشتوكاڵ و سەرچاوەكانی ئاوی هەرێمی كوردستان و بەڕێوەبەری گشتیی بەنداوەكان، كۆبوونەوەیەكی فراوان لەگەڵ بەڕێوەبەری كۆمپانیای جێبەجێكاری بەنداوی چەق چەق و كۆمپانیای دیزاینەر و ڕاوێژكار و تیمی سەرپەرشتیاری بەنداوەكە كرا، تێیدا هەنگاوەكانی دەستپێكردنەوەی پرۆژەكە باسكرا.

لێدوانی فەرمی: بێگەرد تاڵەبانی، وەزیری كشتوكاڵ و سەرچاوەكانی ئاوی هەرێمی كوردستان، "لە ئەژماری فەرمیی خۆی ڕایگەیاند، پشتیوانی تەواوی وەزارەت بۆ تەواوكردن و فراوانكردنی پرۆژەكە دووپات دەكەینەوە، كێشەكانی بەردەم پرۆژەكە چارەسەر دەكەین و ماف و شایستە داراییەكانی كۆمپانیای جێبەجێكار دابین دەكەین، لە پێناو تەواوكردنی پرۆژەكە لە زووترین كاتدا".

ئەوەی پێویستە بیزانیت: پرۆژەی بەنداوی چەق چەق، پرۆژەیەكی گرنگی شاری سلێمانییە كە دەبێتە ئامرازی كۆگاكردنی ئاو و بووژاندنەوەی ئاوی سەرچنار، سوودی گەشتیاری و بووژاندنەوەی ئابووری بە مەودای 15 كیلۆمەتر دەبێت.

باكگراوند: بەنداوی چەق چەق ساڵی 2002 بەردی بناغەی دانرا  و لە ساڵی 2006 تەواوکرا. بەڵام بەرگەی یەک وەرزی بارانبارینی نەگرت و سەرەتای مانگی شوباتی ساڵی 2006 هەرەسی هێنا، هۆكاری دروست نەكردنەوەی بەنداوەكە، هەبوونی ناكۆكی و كێبڕكێیە لەسەر زەوییەكانی دەوروبەری بەنداوەكە لەنێوان ژمارەیەك بەرپرسی ئەو سنوورە بۆ بەرژەوەندیی كەسی.