کچە کوردێکی ڕۆژهەڵات لە ئەمریکا خەڵاتی زێڕین وەردەگرێت بۆ دۆزینەوەی ڕێگەیەکی نوێی چارەسەری شێرپەنجە

ئاڤا نیوز

پەرەستوو قادر مەرزی، توێژەرێکی گەنج و لێهاتووی خەڵکی دێوەڵانی سنە لە ڕۆژهەڵاتی کوردستان، لە ئەمریکا خەڵاتی زێڕینی پێبەخشرا لە پای هەوڵە زانستییەکانی بۆ دۆزینەوەی ڕێگەیەکی نوێ و کاریگەر بۆ چارەسەرکردنی نەخۆشی شێرپەنجە.

چیرۆکی سەرەکی: پەرەستوو مەرزی توانیویەتی بە بەکارهێنانی تەکنەلۆژیای ژیریی دەستکرد (AI)، ڕێبازێکی نوێ بۆ چارەسەری شێرپەنجەی جگەر بدۆزێتەوە. بەپێی توێژینەوەکەی، ژیریی دەستکرد بە شێوەیەکی ورد لە خانە شێرپەنجەییەکان دەکۆڵێتەوە و ڕێکاری نوێ و کاریگەر بۆ لەناوبردنیان دادەڕێژێت. هەروەها سیستمێکی دەرمانی زیرەکی بۆ تووشبووانی شێرپەنجە پێشنیاز کردووە، کە دەتوانێت شۆڕشێک لە بواری چارەسەری ئەم نەخۆشییە ترسناکەدا دروست بکات.

زانیاریی زیاتر: پێشنیاز و دۆزینەوەکانی ئەم توێژەرە کوردە لەسەر ئاستی نێودەوڵەتی پێشوازی و پشتیوانییەکی بەرچاوی لێکراوە. ناوبراو بەشداری لە فێستیڤاڵی نێودەوڵەتی "سیلیکۆن ڤالی" لە ئەمریکا کردووە و لەوێ مەدالیای ئاڵتوونی بەدەستهێناوە.

ئەوەی پێویستە بیزانیت: پەرەستوو مەرزی خاوەنی چەندین کتێب و وتاری زانستییە لە بواری شێرپەنجەدا و لەنێو توێژەرانی جیهانیدا ناوبانگێکی باشی هەیە. ماوەیەکە میدیا فارسییەکان هەوڵ دەدەن ئەم توێژەرە وەک کەسایەتییەکی ئێرانی بناسێنن، بەڵام بە پێچەوانەوە، پەرەستوو مەرزی کە گرووپێکی زانستی لەم بوارەدا پێکهێناوە، هیچ پەیوەندییەکی بە ئێرانەوە نییە و لە کاتی خۆناساندنیشیدا، خۆی وەک توێژەرێکی کورد لە ئەمریکا ناساندووە.