حکومەتی عێراق دەستی بە ناردنی مووچەی مانگی ئادار کرد

ئاڤا نیوز

 

وەزارەتی دارایی عێراق ڕێکارەکانی خەرجکردنی مووچەی مانگی ئاداری مووچەخۆرانی هەرێمی کوردستانی دەستیپێکرد و سەرەتاش مووچەی بەشێکیانی نارد.

 

وێنە گەورەکە: دوێنێ سەرۆکوەزیران بارزانی ڕایگەیاند دوای هەوڵ و کۆششێکی زۆر، توانرا چارەسەرێکی گونجاو بۆ کێشەی خەرجکردنی مووچە دابنرێت، هەر ئەمڕۆش وەزارەتی دارایی عێراق دەستی بە ناردنی بەشێکی کرد. 

بۆچی گرنگە؟ دوای گەیشتنی پارەکە، حکومەتی هەرێمی کوردستان هەوڵدەدات پێش جەژن مووچەی مانگی ئادار دابەش بکات

 

ڕاگەیێنراوی فەرمی: وەزارەتی دارایی عێراق ڕایگەیاند: "بەشی ژمێریاری وەزارەتی دارایی دەستیکرد بە دابینکردنی پارە بۆ مووچەخۆرانی مەدەنی هەرێمی کوردستان، کەمئەندامان لە بەڕێوەبەرایەتییەکانی چاودێری کۆمەڵایەتی، مووچەی خانەنشینانی مەدەنی و سەربازی، کەسوکاری  شەهیدان و ئەنفالکراوان، گرێبەستەکان و فەرمانگەکانی هەرێمی کوردستان بۆ مانگی ئادار".

 

لەلایەکی دیکەوە: محەممەد عەبدولقادر، بەڕێوەبەری ژمێریاری لە وەزارەتی دارایی عێراق بە ئاڤا نیوزی گوت: "بەغدا دەستی بە ناردنی پارەکە کردووە و بەمزووانە مووچەی مانگی سێ دابەش دەکرێت".