ژمارەیەک لە بەكارهێنەرانی ڤاكسینێكی كۆرۆنا تووشی جەڵتە و خوێنمەیین دەبن

ئاڤا نیوز

 

کۆمپانیای دەرمانی بەنێوبانگی بەریتانی ( ئەسترازینیکا) دانی بەوەدا نا، ئەو ڤاکسینەی دژ بە کۆرۆنا درووستی کردووە، دەکرێت هەندێک کاریگەری خراپی لێبکەوێتەوە.

وێنە گەورەکە: کۆمپانیای ئەسترازینیکای بەریتانی کە ڤاکسینی دژ بە کۆرۆنای لەکاتی بڵاوبوونەوەی کۆرۆنا بەرهەمهێنا، بەگوێرەی ڕاپۆرتێکی ڕۆژنامەی تێلیگرافی بەریتانی لەبارەی سەلامەتی ڤاکسینەکە پرسیار درووستبووە و کۆمپانیاکەش دانی بەوەدا ناوە کە ئەو ڤاکسینەی درووستی کردووە هەندێک حاڵەتی جەڵتەی دڵ و خوێنمەیینی لێکەوتووەتەوە.

کاریگەری و لێکەوتەکان: بەهۆی بڵاوبوونەوەی ئەو هەواڵە، چەندین سکاڵای یاسایی لەسەر کۆمپانیای ئەسترازینیکا جووڵێنراوە و باس لەوە کراوە بەشێک لەو کەسانەی ڤاکسینەکەیان بەکارهێناوە گیانیان لەدەست داوە، ژمارەی قوربانییەکانیش گەیشتووەتە 51 کەس و دەبێت کۆمپانیاکە زیاتر لە 100 ملیۆن پاوەن قەرەبوو بدات.

ئەوەی لەوبارەیەوە دەگوترێت: جیمی سکوت، یەکێکە لە سکاڵاکاران دەڵێت "ساڵی 2021 ڤاکسینەکەی بەکار هێناوە و بەهۆیەوە جەڵتە لێی داوە دوای ئەوەی دەماخی زیانی بەرکەوتووە و بەوهۆیەوە ناتوانێت کاربکات.

باکگراوند: ڤایرۆسی کۆرۆنا لەکۆتایی 2019 لە چینەوە سەریهەڵدا، دواتر بە هەموو جیهاندا بڵاو بووەوە و زیاتر لە حەوت ملیۆن کەس  بەهۆیەوە گیانیان لەدەستدا.