ئاڤا نیوز

 

سبەی شاندێکی دیوانی چاودێریی دارایی عێراق بۆ وردبینی لە لیستی مووچە و هێزە ئەمنییەکان سەردانی هەولێر دەکات و لەگەڵ دیوانی چاودێریی دارایی هەرێمی کوردستان کۆدەبێتەوە. 

 

لێدوانی فەرمی: محەممەد زراری، گوتەبێژی دیوانی چاودێری دارایی ھەرێمی کوردستان، بە ئاڤا نیوزی ڕاگەیاند: بڕیارە سبەی شاندێکی دیوانی چاودێری داریی عێراق سەردانی هەولێر بکەن و لەگەڵ دیوانی چاودێری دارایی هەرێمی کوردستان وردبینی لە لیستی مووچەی مانگی "چوار و پێنجی" هێزە سەربازییەکان و خەرجی و داهاتی "سێ" مانگی سەرەتا ئەمساڵ هەرێمی کوردستان بکەن.

ئەوەی پێویستە بیزانیت: تا ئێستا فەرمانی خەرجکردنی مووچەی مانگی چوار و پێنجی وەزارەتی پێشمەرگە و هێزە ئەمنییەکانی هەرێمی کوردستان لە لایەن عێراقەوە نەدراوە.

 

ئەمەش بزانە: سەرچاوەیەک لە وەزارەتی دارایی و ئابووری هەرێمی کوردستان پێشتر بە ئاڤا نیوزی گوت:" مووچەی مانگی هێزە ئەمنییەکان بە لیستێکی جیاوازتر هەولێر و بەغدا لەسەری ڕێکدەکەون، پێشتر هەمووی کۆد بوو، دەبێت ئەمجارە بەشێکی بەناو و بەشێکی کۆد بێت".

 

وێنە گەورەکە: ماوەی چوار ڕۆژە وەزارەتی دارایی هەرێمی کوردستان، لیستی مووچەی مانگی ئایاری مووچەخۆرانی هەرێمی کوردستانی ڕادەستی وەزارەتی دارایی حکومەتی عێراق کردووە، بەڵام دوێنێ وەزارەتی دارایی عێراق دەستی بە خەرجکردنی مووچە کرد.