حیجاب بووەتە پرسی سەرەکی هەڵبژاردنی سەرۆککۆماری ئێران

ئاڤا نیوز

هەر لە سەرەتای بانگەشەکانی هەڵبژاردنی سەرۆککۆماریی ئێرانەوە تا ئەمڕۆ هەینی، کە خەڵک لە بەیانییەوە دەچێتە سەر سەندووقەکانی دەنگدان، 'پرسی حیجاب' و 'گەڵاڵەی نور'، پرسێکی گەرمی بەربژێرەکان بووە.

وێنە گەورەکە: دوای گیانلەدەستدانی ژینا ئەمینی ـ ئەو کچە سنەییەی ڕۆژهەڵاتی کوردستان کە لە لایەن ئەندامانی 'گەشتی ئیرشاد' و بە بیانووی بێحێجابی دەستبەسەر و دواتر گیانی لەدەست دا، دەسەڵاتیی ئێران بۆ ماوەیەک دەستبەسەرکردنی ژنانی بەهۆی "لەبەرچاونەگرتنی ڕێنوێنییەکانی دەسەڵات لەسەر حیجاب" کەم کردەوە، بەڵام ئیبراهیم ڕەئیسی ـ بەر لە مردنی، 'گەڵالەی نور'ی دانا بۆ ئەوەی ژنان و کچان لە بێحیجابی پەشیمان بکاتەوە بێ ئەوەی تووندوتیژیی زۆر ڕووبدات.

گۆشەیەکی دیکەی دیمەنەکە: لە بەرامبەردا و لەم کاتی هەڵبژاردنەدا، لە چوارڕیان و مەیدانە سەرەکییەکانی شاری تارانی پایتەختی ئێران، ئۆتۆمبێل و 'ڤانەکانی گەشتی ئیرشاد' وەستاون بۆ دەستبەسەرکردنی ئەو کچ و ژنانەی حیجاب نین. لە ماوەی ڕابردوو و لە نێو تۆڕە کۆمەڵایەتییەکاندا، چەندین ڤیدیۆی تووندوتیژی لە دەستبەسەرکردنی کچان و ژنان لە لایەن هێزە ئەمنییەکان بە بیانووی خراپی حیجاب بڵاو بووەوە.

لێدوانی فەرمی: مەسعوود پزیشکیان ـ پاڵێوراوی ڕیفۆرمخوازەکان، لە بارەی گەڵاڵەکەوە گوتی: "بە زۆری ناکرێت فکرەیەک بسەپێنرێت، ئەو شتەی من وەک مرۆڤ بڕوام پێیەتی، خزمەتکردنە بە خەڵک. ئێمە کارێکمان کردووە ژنان و کچان نەفرەتمان لێ بکەن. تا ئەو جێگەیەی بتوانم، پێش بە گەشتی ئیرشاد دەگرم".

درێژەی ڕاپۆرت
ڕێکخراوی لێبوردنی نێونەتەوەیی، مانگی مارسی ڕابردوو ڕایگەیاند: "ئۆتۆمبێلی دەیان هەزار ژن وەک سەرپێچی دەستیان بەسەردا گیراوە، تەنیا لەبەر ئەوەی شۆفێرە کچ یا ژنەکانیان حیجابیان بە پێی خواستی دەسەڵات نەبووە و خۆشیان ڕووبەڕووی زیندان و سزای نەختینە و لێدانی قامچی بوونەتەوە".
هادی قائیمی، بەڕێوەبەری کەمپەینی مافی مرۆڤی ئێران گوتوویەتی "کۆماری ئیسلامی سوود لە دەرفەتی هەڵبژاردن و سەرەنجڕاکێشانی ژنە چالاکوانەکان وەردەگرێت و دەستبەسەریان دەکات" و بە پێی زانیارییەکانی ئەو کەمپەینە تا ئێستا 12 ژنی چالاکوان دەستبەسەر کراون.

نێرگس محەمەدی، چالاکی مافی مرۆڤ و براوەی خەڵاتی نۆبڵی ئاشتی، کە ئێستا لەسەر ئەم پرسە لە زیندانی ئێڤینی تارانە، هەڵبژاردنی سەرۆککۆماری بایکۆت کرد و لە زیندانەوە گوتی: "چۆن دەتوانن لە کاتێکدا دەستێکتان دار و چەک و زیندانە دژی خەڵک، بە دەستەکەی ترتان سەندووقی دەنگدان بخەنە پێش هەمان خەڵک و فریویان بدەن."

باکگراوند: حیجاب و باڵاپۆشی لە دەستووری کۆماری ئیسلامی ناچارییە، سزاکەشی لە دەستبەسەرکردنی کاتی و قامچی و 10 ساڵ زیندان درێژ دەبێتەوە.