ئاڤا نیوز وادەی دابەشکردنی مووچەی هێزە ئەمنییەکان ئاشکرا دەکات

ئاڤا نیوز

ڕێککەوتن لەسەر مووچەی مانگی پێنجی پێشمەرگە و هێزە ئەمنییەکان کراوە و هەفتەی داهاتوو خەرج دەکرێت، لە  ڕۆژانی داهاتووشدا وردبینیکردن بۆ مووچەی مانگی شەش تەواو دەکرێت.

 

وێنە گەورەکە: وەزارەتی دارایی عێراق مووچەی مانگی شەشی زۆربەی مووچەخۆرانی مەدەنی ناردووە، بەڵام هێشتا مووچەی مانگی پێنج و شەشی پێشمەرگە و هێزە ئەمنییەکانی خەرج نەکردووە.

ئەوەی پێویستە بیزانیت: سێ ڕۆژە شاندێکی حکومەتی عێراق بۆ وردبینی لە لیستی مووچەی پێشمەرگە و هێزە ئەمنییەکان لە هەرێمی کوردستانە، شەوی ڕابردووش لیژنەیەکی دیکە بۆ هەمان مەبەست سەردانی هەولێری کرد. دوێنێ سێشەممە شۆڕش ئیسماعیل، وەزیری پێشمەرگە ڕایگەیاند، لەم دوو ڕۆژەدا کێشەکە چارەسەر دەبێت.

زانیاریی تایبەت: سەرچاوەیەک لە وەزارەتی دارایی و ئابووریی حکومەتی هەرێمی کوردستان بە ئاڤا نیوزی گوت، ڕێککەوتن لەسەر مووچەی مانگی پێنج  کراوە، هیچ کێشەیەکی نەماوە و هەفتەی داهاتوو لەلایەن بەغدا خەرج دەکرێت، ڕاستەوخۆش دەست بە دابەشکردنی دەکرێت.

لەلایەکی دیکەوە: لەم دوو ڕۆژەدا وردبینی بۆ لیستی مووچەی مانگی شەشی پێشمەرگە و هێزە ئەمنییەکان تەواو دەکرێت، سەرچاوەکەی وەزارەتی دارایی گوتی: دەکرێت هەردوو مووچەکە بەیەکەوە بنێردرێن، بەڵام دڵنیا نین.