سەرۆکوەزیران بارزانی و قاسم ئەعرەجی جەخت لە پاراستنی ئاسایشی ناوچە سنوورییەکان دەکەنەوە

ئاڤا نیوز

 

سەرۆکوەزیران بارزانی لە هەولێر پێشوازی لە قاسم ئەعرەجی، ڕاوێژکاری ئاسایشی نەتەوەیی عێراق کرد و گفتوگۆیان لەبارەی هەماهەنگییە ئەمنییەکانی نێوانیان و دەرئەنجامەکانی کۆبوونەوەی ئەنجوومەنی ئاسایشی نیشتمانی کرد. 

 

وێنە گەورەکە: لەسەر ڕاسپاردەی فەرماندەی گشتیی هێزە چەکدارەکانی عێراق، ئەمڕۆ شاندێکی باڵای ئەمنیی عێراق بە سەرۆکایەتیی قاسم ئەعرەجی، ڕاوێژکاری ئاسایشی نەتەوەیی گەیشتە هەولێر.

 

ڕاگەیێنراوی فەرمی: نوسینگەی ڕاگەیاندنی سەرۆكوەزیران بارزانی بڵاویكردەوە: بیروڕامان لەبارەی دوایین گۆڕانکاری و پەرەسەندنەکانی بارودۆخی ئه‌منیی عێراق بەگشتی ئاڵوگۆڕ کرد. جەختمان لە پەرەپێدانی هاریکاری و هەماهەنگیی نێوان حکومەتی هەرێمی کوردستان و حکومەتی فیدراڵ بۆ ڕووبەڕووبوونەوەی مه‌ترسی و هه‌ڕه‌شه‌كانی تیرۆر و پاراستنی ئاسایش و سەقامگیری ناوچە سنوورییەکان کردەوە.

زانیاریی زیاتر: هەردوولا هاوڕابوون لەسەر گرنگیی جێبەجێکردنی ڕێککەوتننامەی شنگال و ئاساییکردنەوەی دۆخی دەڤەرەکە.

 

ئەوەی پێویستە بیزانیت: دوێنێی ئەنجوومەنی ئاسایشی نیشتمانیی عێراق بە سەرۆکایەتیی محەممەد شیاع سوودانی، فەرماندەی گشتی هێزە چەکدارەکان کۆبووە و "لەشکرکێشی و پێشێلکارییە سەربازییەکانی تورکیا بۆ سەر خاکی عێراقی ڕەتکرایەوە"، هاوکات بەپێویست زانرا تورکیا ڕەچاوی پرەنسیپەکانی دراوسێیەتی باش بکات.