پلاندانانی عێراق دووەم قۆناغی سەرژمێریی دەستپێدەکات

ئاڤا نیوز 

 

لە چوارچێوەی دووەم قۆناغی پرۆسەی سەرژمێرییدا، لە ئەمڕۆوە تیمەکانی وەزارەتی پلاندانانی عێراق و هەرێمی کوردستان سەردانی ماڵان دەکەن و خێزانەکان لەو بەڵگەنامە فەرمییانە ئاگادار دەکەنەوە کە پێویستە لە ڕۆژانی 20 و 21ـی ئەم مانگەدا ئامادەی بکەن تاوەکو لە سەرژمێرییدا تۆماربکرێن.

 

وێنە گەورەکە: ڕۆژانی 20 و 21ـی ئەم مانگە لە عێراق و هەرێمی کوردستان پڕۆسەی سەرژمێریی گشتی دانیشتووان دەکرێت، قۆناغی یەکەمی پڕۆسەکەش کە بریتی بوو لە ژمارەدان لە ماڵ و باڵەخانەکان و دیاریکردنی سنووری جوگرافی هەر بازنەیەکی سەرژمێریی، کۆتایی هاتووە.

 

لێدوانی فەرمی: عەلی ئەلساعدی، بەڕێوەبەری جێبەجێکاری پڕۆسەی سەرژمێریی لە عێراق بە ڕۆژنامەی سەباحی ڕاگەیاندووە، لە ئەمڕۆوە تیمەکانی تایبەت بە سەرژمێریی دەچنە ئەو ناوچانەی کە بۆیان دیاریکراوە و سەردانی خێزانەکان دەکەن بۆ ئەوەی بەڵگەنامە پێویستەکان بۆ ڕۆژی سەرژمێریی ئامادە بکەن، هاوکات لە بەیانییەوە تا 19ـی مانگ، تیمەکان وردەکاری زانیارییەکان لە خێزانەکان وەردەگرن و تۆماری دەکەن.

 

لەلایەکی دیکەوە: بەگوتەی بەڕێوەبەری جێبەجێکاری پڕۆسەی سەرژمێریی، ڕۆژانی 20 و 21ـی مانگ تیمەکان دوایین سەردانی خێزانەکان دەکەن بۆ دڵنیابوونەوە لەو زانیارییانەی کە لە قۆناغەکانی پێشتردا تۆماریان کردوون و ئەگەر گۆڕانکاری ڕوویدابوو بەتایبەت ئەوەی پەیوەستە بە لەدایکبووان و مردووانەوە، دەستکاری داتاکان دەکرێت و نوێ دەکرێنەوە.

 

زانیاریی زیاتر: پەیوەست بە قەدەغەی هاتووچۆش، عەلی ئەلساعدی دەڵێت، ڕۆژانی 20 و 21 ئەم مانگە خەڵک ناچار ناکرێت بە مانەوەی لەماڵدا بەڵکو ڕێگری لە هاتووچۆ لەنێوان پارێزگاکان و قەزا و ناحییەکاندا دەکرێت، بەڵام جوڵەی هاووڵاتییان بۆ شتکڕین و دابینکردنی پێداویستییە گرنگەکانیان لە ناوچەکانی خۆیاندا ئاسایی دەبێت.