سوودانی بۆ ترەمپ: عێراق چاوی لە پتەوکردنی هاوکاری و هاوبەشییە لەگەڵ ئەمریکا

 

ئاڤا نیوز

سەرۆکوەزیرانی عێراق پەیامێکی ئاڕاستەی دۆناڵد ترەمپ کرد بەبۆنەی دەستبەکاربوونی وەکو سەرۆکی ئەمریکا و ئاماژەی بۆ پەرەپێدان بە هاوکاری و هاوبەشییەکان نێوان هەردوو وڵات کرد.

وێنە گەورەکە: ڕۆژی دووشەممە، دۆناڵد ترەمپ وەکو سەرۆکی ئەمریکا سوێندی یاسایی خوارد و دەستبەکاربوو، بەم بۆنەیەشەوە سەرۆکوەزیرانی عێراق پیرۆزبایی لێکرد و جەختی لەسەر کاراکردن و فراوانکردنی یاداشتە دووقۆڵییەکان کردەوە.

ڕاگەیێنراوی فەرمی: سوودانی لە ڕاگەیێنراوێکدا ڕایگەیاند: 

- عێراق چاوی لە پتەوکردنی پەیوەندییە هاوبەشەکانە لەگەڵ ئەمریکا لە چوارچێوەی ڕێککەوتنی ستراتیژی و بەرژەوەندییە هاوبەشەکان، جەختیشی لەسەر گرنگی کارکردن بۆ پشتیوانیکردنی سەقامگیری و ئاسایش و گەشەپێدان لەسەر ئاستی ناوچەیی و نێودەوڵەتی کردەوە.

- حکومەتی عێراق پابەندە بە پەیوەندییە ستراتیژییەکان لەگەڵ ئەمریکا، هەوڵدەدات یاداشتە لێکتێگەیشتنەکانی دوولایەنە کارا و فراوانتر بکات و هەماهەنگی ئەمنی و ئابووری، لەژێر چەتری ڕێزگرتن لە سەروەری، دەستوەرنەدان لە کاروباری ناوخۆ، پشتگیریکردن لە ئاڵوگۆڕی دوولایەنە لە بوارەکانی کولتووری و تەکنەلۆژیا، بوارەکانی وەبەرهێنان و گەشەپێدانی بەردەوام.

لە لایەکی ترەوە: عەبدوللەتیف ڕەشید، سەرۆککۆماری عێراق لە تۆڕی کۆمەڵایەتی "ئێکس" پیرۆزبایی لە ترەمپ کرد و ڕایگەیاند: پشتیوانی خۆمان بۆ بەرقەرارکردنی ئاسایش و سەقامگیری لە ناوچەکە و جیهاندا دووپاتدەکەینەوە، هەروەها پتەوکردنی پەیوەندییە دووقۆڵییەکانی نێوانمان بە شێوەیەک کە بەرژەوەندییە هاوبەشەکانی هەردوولا بەدیبهێنێت.