سوننەکانی عێراق داوای "دادپەروەریی کۆمەڵایەتی" دەکەن

ئاڤا نیوز

سەرۆکی پەرلەمانی عێراق لەگەڵ بەشێک لە سەرکردە دیارەکانی سوننە کۆبووەوە و هەردوولا دەڵێن، گرنگە سەرکردەکانی ئەو پێکهاتەیە یەکڕیزبن و پێکەوە داوای دەرچوواندنی ئەو یاسایانە بکەن کە "دادپەروەریی کۆمەڵایەتیی" بەدیدەهێنن.

وێنە گەورەکە: سوننەکانی عێراق باوەڕیان وایە لەبوارەکانی دامەزراندن لە کەرتی سەربازیی، دەرچواندن و جێبەجێکردنی یاساکان و مافی نوێنەرایەتی ڕاستەقینە، وەک پێویست ڕۆڵیان پێنادرێت و خۆیان وەک پێکهاتەیەکی پەراوێزخراو دەبینن.

ڕاگەیێنراوی فەرمی: مەحموود مەشهەدانی، سەرۆکی پەرلەمانی عێراق ئەمڕۆ شەممە لەگەڵ بەشێک لە سەرکردە دیارەکانی سوننە کۆبووەوە، نووسینگەکەی دەڵێت، لە کۆبوونەوەکەدا دۆخی سیاسی عێراق و دەرچواندنی ئەو یاسایانە تاوتوێ کراون کە ڕۆڵی بەرچاویان هەیە لە بەدیهێنانی ئاشتەوایی کۆمەڵایەتیدا.

بەشێکی دیکە لە ڕاگەیێنراوی کۆبوونەوەکە:

- چارەسەری پێویست و گشتگیر بۆ دۆسیەی کۆچبەر و ئاوارەکان بدۆزرێتەوە.

پێکەوەکارکردن لە دامەزراوەکانی دەوڵەت بەهێزتر بکرێت، ڕۆڵی ئەنجوومەنی پارێزگاکانیش لە پشتیوانی گەشەپێدان پتەوتر بکرێت.

بۆ پاراستنی ئاسایشی عێراق و پەیوەست بە ڕووداوە هەرێمییەکان، جەخت لە هەڵوێستی یەکگرتووی سوننەکان دەکەینەوە.

بەیەک هەڵوێست کاردەکەین بۆ قەرەبووکردنەوە و هێنانەکایەی دادپەروەریی بۆ ستەملێکراو و ئاوارەکان و پاراستنی ئارامیی پارێزگا ئازادکراوەکان.