ژمارەی کوژراوانی چەند ڕۆژی ڕابردووی سووریا 1300 کەسی تێپەڕاند

 

ئاڤا نیوز

ڕوانگەی سووری بۆ مافەکانی مرۆڤ بانگەوازێکی بەپەلە ئاراستەی دەسەڵاتدارانی سووریا لە دیمەشق دەکات بۆ لێپرسینەوە لە کارمەندانی هێزە ئەمنی و سەربازییەکان کە دەستیان لەو کۆمەڵکوژییە هەبووە.

وێنە گەورەکە: لە وەڵامی هێرشی پاشماوەکانی ڕژێمی ئەسەد بۆ سەر هێزە ئەمنییەکانی حکومەتی کاتیی سووریا لە شەوی 6ـی ئازار لە کەناراوەکانی سووریا، سەدان چەکدار لە هەردوولا و هاووڵاتی سڤیل کوژران.

بڵاوکراوەی فەرمی: بە گوێرەی ڕوانگەی سووری بۆ مافەکانی مرۆڤ کۆی گشتیی ژمارەی کوژراون لە ماوەی 72 کاتژمێردا لە ڕیزەکانی پاشماوەکانی ڕژێمی پێشوو، هێزەکانی سووریا و خەڵکی سڤیل گەیشتە هەزار و 311 کەس.

ژمارەکان وادەڵێن:

٠ 231 ئەندامی هێزە ئەمنییەکان و ئەندامانی وەزارەتی بەرگری و 250 چەکداری عەلەوی، "پاشماوەکانی ئەسەد" کوژراون.

٠ 830 هاووڵاتی سڤیل لە ئەنجامی ئۆپەراسیۆنەکانی پاکتاوکردن لە سەرەتای سەرهەڵدانی هێرشەکان بۆ سەر هێزە ئەمنی و سەربازییەکان لە ڕۆژی پێنجشەممە 6ـی ئازار کوژراون.

کوژراوەکان بەگوێرەی پارێزگاکان:

519 لە لازقیە

220 لە تەرتووس

85 لە حەما

6 لە حمس

داواكاری فەرمی: بە پشتبەستن بەو ئامارانە و هۆشدارییەکان سەبارەت بە مەترسی پەرەسەندنی تووندوتیژی دژی خەڵکی سڤیل لە سووریا، ڕوانگەی سووری بۆ مافەکانی مرۆڤ داوا لە کۆمەڵگەی نێودەوڵەتی دەکات ڕێوشوێنی بەپەلە بگرێتەبەر و تیمی تایبەتمەندی لێکۆڵینەوەی نێودەوڵەتی بنێرن بۆ بە دۆکیۆمێنتکردنی ئەو پێشێلکارییانەی کراوەتە سەر خەڵکی سڤیل.

ئەوەی پێویستە بیزانیت: بەمەبەستی لێکۆڵینەوە لە هۆکاری گرژییەکانی چەند ڕۆژی ڕابردوو و ئەو پێشێلکارییانەی بەرامبەر هاووڵاتیانی مەدەنی کراون، سەرۆککۆماری سووریا بۆ قۆناغی ڕاگوزەر لیژنەیەکی "سەربەخۆ و نیشتیمانی" پێکهێنا.

لەلایەکی دیکەوە: مەزڵوم عەبدی، فەرماندەی هێزەكانی سووریای دیموكرات، داوای لە ئەحمەد شەرع، سەرۆککۆماری سووریا بۆ قۆناغی ڕاگوزەرکرد، لێپرسینەوە لەگەڵ ئەنجامدەرانی کومەڵکوژییەکانی سێ ڕۆژی ڕابردووی ناوچە جیاجیاكانی كەناری ڕۆژئاوای سووریا بكات.