پەرلەمانی عێراق دۆسیەی بێسەروشوێنان زیندوو دەکاتەوە

ئاڤا نیوز

بەمەبەستی سوود وەرگرتن لە ئەزموونی بۆسنە و هەرسک لەبواری ئاشکراکردنی کەسانی بێسەروشوێن، شاندێکی پەرلەمانی عێراق لەو وڵاتەیە و دەیانەوێت دۆسیەی بێسەروشوێنان لە عێراقیش سەرلەنوێ زیندوو بکرێتەوە.

ئەوەی پێویستە بیزانیت: بەگوێرەی ڕێکخراوی لێبووردنی نێودەوڵەتی لە ساڵی 1968ـەوە،  250 هەزار بۆ یەک ملیۆن کەس لە عێراق بێسەروشوێن بوون و تائێستا هیچ چارەسەرێکی ئەو دۆسیەیە نەکراوە، ماوەی ڕابردووش پێشنیازێک هەبوو دەستەیەکی تایبەت بە بێسەروشوێنان پێکبهێنرێت.

لێدوانی فەرمی: شێروان دووبەردانی، ئەندامی لیژنەی شەهیدان و مافەکانی مرۆڤ لە پەرلەمانی عێراق و ئەندامی شاندەکەی پەرلەمان بۆ کۆماری بۆسنە و هەرسک بە ئاڤا میدیای ڕاگەیاند، ئەم وڵاتە لەکاتی گرژییەکانی چەند دەیەی ڕابردوودا 42 هەزار بێسەروشوێنی هەبووە و ئێستا 75%یان چارەنوسیان ئاشکرا کراوە، بۆیە دەیانەوێت عێراقیش سوود لە ئەزموونی ئەم وڵاتە لەم بوارەدا وەربگرێت.

- شاندەکەی پەرلەمان لەگەڵ لیژنەی نێودەوڵەتی بێسەروشوێنان کۆدەبێتەوە کە ئێستا نووسینگەیان لە عێراق هەیە، تا پێکەوەکارکردن بەمەبەستی ئاشکراکردنی چارەنوسی بێسەروشوێنان لە عێراق کاراتر بکەن.